Tasiilap avataani uuliaarluertoqarunartoq
Uuliaasorineqartoq kujammut kimmut arriitsunnguamik sarfaanneqarpoq.
Uuliarluersimasorisaq qaammataasamit nakkutilliissummit Clean Sea Netimit siullermik takuneqarpoq, kingornalu kilisaatinit qanittuaniittunit aamma takuneqarsimasoq nalunaarutigineqarluni.
Issittumi Sakkutooqarfiup timmisartoq nakkutilliissut qulangiuaaritimmagu uuliaarluernertut isikkoqartumik takunnissimallutik nalunaarput.
Qulangiuaarisut oqaatigaat uuliaasorineqartoq annikitsuinnaasoq, kisianni allamik uuliaarluertoqarsimanersoq qulakkeerneqanngilaq.
Sinerissamik nakkutilliissut Knud Rasmussen aamma takunniffimmukartinneqarput, uuliaarluernerusimappat salinneqarsinnaanersoq nalilerneqassammat, suliassarlu eqqartuussivimmut suliassanngortinneqassagaluarpat uppernarsaatissamik tigusisoqarniassammat.
Issittumili Sakkutooqarfimmit silarlunnera pissutigalugu sikoqarpallaaneratalu kinguneranik uuliaarluerfiusorisap sinerissamik nakkutilliissummit tikinneqarsinnaannginnissaa ernumanartoqartinneqarpoq, tamatumami kinguneranik sinerissamik nakkutilliissutip aqagu aqaguaguluunniit apuussinnaanissaa kinguarsarneqarsinnaammat.
Avatangiisinut Naalakkersuisoqarfik pisoq pillugu nalunaarfigineqareersoq, Issittumi Sakkutooqarfiup oqaatigaa. Sumiiffimmullu tunngatillugu qaammataasamit alapernaanneqarnerunissaa.
