Avannaata Qimussersua annikillisamik pissaaq

Qimussit 40-ut missaaniittut Avannaata Qimussersuani martsip 28-at Uummannami sukkaniuttussanngorput. KNQK taama tallimanngornermi aalajangerpoq.

AAMMA ATUARUK Coronamut aarlerineq: Avannaata Qimussersuaaraa taamaatinneqartoq

Ukiormanna Avannaata Qimussersuaqarnissaa pisarnermit allaanerusumik piareersarfigineqarpoq nualluussuup coronap tuniluussinnaanera ernummatigineqarmat. Sukkaniunnersuaq pingaartinneqaqisoq kujataani Sisimiuni avannamut Upernaviup eqqaamiunit peqataaffigineqartussaavoq. KNQK-mit naatsorsuutigineqarpoq peqataasussat tamarmik apuutissappata qimussit 44-ut sukkaniuteqataassasut.

Meeqqat Avannaata Qimussersuaararnissaat taamaatiinnarneqarpoq nualluussuaq corona ernummatigineqarmat.

AAMMA ATUARUK Avannaata qimussersua: Aasiammiut anngunniuteqqissasut

Aallakaatinneqassanngilaq

- Avannaata Qimussersua annikillisamik martsip 28-at pissaaq. Taamaattoq illup iluani pisussat tamarmik taamaatiinnarneqarput. Unnukkut aaqqissuussinissaagaluaq kingusinnerusukkut Uummannami aaqqissuunneqarumaarpoq, KNQK-mi siulittaasoq Johan Olsen oqarpoq, nangillunilu:

- Ilanngullugu aalajangiunneqarpoq arlaat peqataasinnaajunnaassagaluarpat allamik taarserneqassanngitsoq, Johan Olsen oqarpoq.

Pilersaarutaagaluarpoq sukkaniunnersuup KNR-TV-kkut toqqaannartumik aallakaatinneqarnissaa. KNR-illi coronamut sillimaniarnera pissutigalugu sulinermut atatillugu angalanerit tamarmik taamaatinneqarput. Taamaattumik sukkaniunneq aallakaatinneqassanngilaq.

Sumiiffikkaartumik anngunniulluni sukkaniunnerit suli ingerlapput. KNR.gl-mi allaaserineqareersutut Aasianni anngunniuteqqittussanngorput arfininngormat kingullermik aaqqissuisut kukkuluttoreersut. Tassani qimussit pingasut kisimik eqqortumik aallartinneqarput.