Coronamut aarlerineq: Avannaata Qimussersuaaraa taamaatinneqartoq
Avannaata Qimussersua Uummannami qaammammi uani pisussaq taamaatinneqassanngitsoq siullermik nalunaarutigineqarpoq.
Kalaallit Nunaanni Qimussertartut Kattuffianni (KNQK) siulittaasup tulliata tamanna ataasinngornermi nalunaarutigaa. Ukioq mannalu Arctic Circle Racernissaraluaq coronavirusip tuniluutilertornissaata aarleqqutigineqarnera pissutaalluni taamaatinneqartoq ataasinngornermi aamma nalunaarutigineqarpoq.
Canadamilu ukioq manna Arctic Winter Gamesernissaraluaq coronavirusip tuniluutilertornissaata aarleqqutigineqarnera aamma pissutaalluni sapaatip akunnerata naanerani taamaatinneqarpoq.
AAMMA ATUARUK Trods coronafrygt: GM i hundeslæde bliver ikke aflyst
Aaqqissuisulli tassa KNQK-p isumanni allanngortippaa. Coronavirusimimmi nunatsinni tunillanneqarsimasunik suli paasisaqartoqanngikkaluartoq Avannaata Qimussersuaaraa taamaatinneqarpoq.
Tunillaassortunik nappaalasoqarneranut ataatsimiititaliarsuup innersuussutai:
- innuttaasut nunami aarlerinaatilimmeereerlutik nunatsinnut uternerminniit ulluni 14-ini tulliuttuni angerlarsimaannaqqusaapput.
- innuttaasut nunami aarlerinaatilimmeereerlutik nunatsinnut utersimasut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutinnginnissaat innersuussutaavoq.
- Aaqqissuussat inunnit 1000-init amerlanerusunik peqataaffigineqarsinnaasut unitsinneqarnissaat kinguartinneqarnissalluunniit tunillaassortunik nappaalasoqarneranut ataatsimiititaliarsuaq tallimanngornermi inassuteqarpoq.
- Aqqutissiuusseqataarusunngilavut tuniluuttumut aarleqquteqaraluttuinnarnerup ikummarissaqqinnissaanut, aningaasaliisartutsinniillu apeqqusersorneqarusugata, Mikkel Jeremiassen taama oqarpoq.
Avannaata Qimussersua suli taamaatinneqanngitsoq
Avannaata Qimussersuaaraa marsip ulluisa 24-anni pisussaagaluarpoq.
Avannaata Qimussersua marsip ulluisa 28-anni pisussaq suli taamaatinneqanngilaq. Avannaata Qimussersua taamaatinneqassanersoq tallimanngornermi naliliivigineqassasoq, Mikkel Jeremiassenip ilanngullugu oqaatigaa.
Inersimasut 44-t meeqqallu qulit 20-llu akornanni amerlassusillit Avannaata Qimussersuani peqataanissaminnut nalunaarsimapput.
Aaqqissuussat inunnit 1000-nit ikinnerunngitsunit peqataaffigineqartussat taamaatinneqarlutilluunniit kinguartinneqassasut, tunillaassortunik nappaalasoqarneranut ataatsimiititaliarsuup tallimanngornermi innersuussutigaa.
AAMMA ATUARUK Ataatsimiititaliarsuaq: 1000-imik amerlanerusut katersuunnissaat unitsillik kinguartillilluunniit
Aaqqissuussaq 1000-nit ikinnerusunik peqataaffigineqartussaq tunillatsinnissamut aarlerinaateqarnerulersitsisarnera pissutaalluni kinguartinneqassanersoq taamaatiinnarneqassanersorluunniit, aaqqissuisut aalajangertariaqarpaat. Inuppassuit katersuukkaangamik peqataasullu imminnut qanillattorpallaaraangamik tunillatsinnissaminnut qaninnerulertarput. Illumilu aaqqissuussamiinneq silami aaqqissuussamiinnermit tunillatsinnissamut qaninnerulersitsisinnaasartoq,” tunillaassortunik nappaalasoqarneranut ataatsimiititaliarsuup tallimanngornermi ilisimatitsissutigaa.
Avannaata Qimussersua Ilulissani ingerlanneqaraangat isiginnaartut 1000-nit amerlanerusarput. Aaqqissuisulli ilimagaat, Uummannami taama amerlatiginavianngitsut.
Coronavirusip tuniluunnerata nunatsinni timersornerup silarsuaanut sunniuteqarnera pillugu oqallinneq KNR-TV-mi unnugu nalunaaqutaq arfineq-pingasunut toqqaannartumik aallakaatinneqassaaq.
