Naak corona pillugu annilaangassuteqartoqaraluartoq: Avannaata Qimussersua allannguuteqanngitsoq

Coronavirusip annilaangatigineqarnera pissutigalugu Arctic Winter Games siulliulluni taamaatiinnarneqarpoq.

Arctic Circle Racemi siulersuisut ukioq manna unamminissap, nunarsuarmi sisoraaserluni unamminerni sakkunerpaajusup taamaatiinnarneqarnissaa aamma nalunaarutigaat.

Taamaakkaluartoq Avannaata Qimussersua pilersaarut malillugu ingerlanneqassaaq. Avannaata Qimussersuani siulittaasup tullia, KNR-imut oqarpoq.

Inuit 1000-it sinnerlugit peqataaffigisinnaasaasa unitsiinnarneqarnissaat kinguartinneqarnissaalluunniit Tunillaassortunik nappaalasoqarneranut ataatsimiititaliarsuup inassutigigaluaraa, Avannaata Qimussersua ingerlanneqassaaq. Avannaata qimussersuani siulittaasup tullia, Mikkel Jeremiassen taama oqarpoq.

AAMMA ATUARUK Kangerlussuarmi coronavirusip annilaangatigineqarnera: Savalimmiunit angalasut pingasut mattunneqartut

- Tassa Avannaata Qimussersua aamma Avannaata Qimussersuaaraa pilersaarut malillugu ingerlanneqassaaq, tassa allannguuteqanngillat, taanna naqissusissavarput.

Mikkel Jeremiassenip oqarnera naapertorlugu Avannaata qimussersuaata ingerlanneqarnisssaanut atasumik assigiinngitsuni kikkut tamarmik peqataaffigisinnaasaanik sammisassaqartitsisoqartarpoq. Tamakkua sapaatit akunnerannik sioqqutillugu pissapput. Taamaammallu coronavirusip katerisimaarnerminni tunillaassuutinnginnissaannik suliaaqartunik pilersitsipput, orniguttussat peqataasussallu nualluummik tuniluutsitsinnginnissaanik ilitsersuusiortunik.

- Eqitaarinerit, assamminnerit tamakku tunillaassuinermut aqqutaasinnaasut tamaasa aamma soorunami ersarissaassutigissavagut. Nalunaarutigissavagut tamanut ammasumik, taavalu aamma qimussertartut kattuffiata nittartagaa atorlugu tamakku ilioqqarneqassapput.

AAMMA ATUARUK Arctic Circle Race corona virus peqqutigalugu taamaatiinnarneqarpoq

Avannaata Qimussersua naammassineqaraangat peqataasut katersortarfimmi unnukkut nereqatigiittarput, siulittaasulli tulliata oqarnera naapertorlugu nereqatigiittut inuit 700-t missaanniittarput.

Tunillaassortunik nappaalasoqarneranut ataatsimiititaliarsuaq: Eqqarsarluaritsi

Nualluutip coronavirusip illup iluani sukkanerusumik tuniluuttarnissaa ilimanaateqarnerusoq, Tunillaassortunik nappaalasoqarneranut ataatsimiititaliarsuup allaaserisaani ilaavoq.

Nereqatigiinnissamullu sillimaneq qanoq inissisimanersoq apeqqutigigatsigu, Mikkel Jeremiassen ima akivoq:

- Illup iluata titartagartaa, aaqqissuisullu saniatigut oqartussaasut susassaqartut soorlu peqqinnissaqarfik akuerisaanik titartagaq taanna inississussavarput, inuit imminnut qanoq qanitsiginissaat nassaarissavarput inuillu amerlanerpaamik qassit isersimanissaat tassani annerpaaffissalerneqassaaq.

AAMMA ATUARUK Coronavirus pillugu tusagassiortunik katersortitsineq takujuk takoqqigulluunniit

Avannaata Qimussersuani inuit 44-t unammeqataaniarlutik nalunaarsimaapput, Avannaatalu Qimussersuaaraani qulit 20-llu akornanni peqataaniarlutik nalunaarlutik.

Avannaata Qimussersua Ilulissani ingerlanneqaraanga inuit 1000-it sinneqartut isiginnaariartartut siulitaasup tulliata oqaatigaa. Massakkulli Uummannami inuit 800-t 900-llu akornanni isiginnaariarnissaat naatsorsuutigineqarpoq.

Avannaata Qimussersuaaraa Uummannami marsip ulluisa 24-anni ingerlanneqassaaq. Taassumalu kingorna Avannaata Qimussrsua marsip ulluisa 28-ani ingerlanneqassalluni