Kangerlussuarmi coronavirusip annilaangatigineqarnera: Savalimmiunit angalasut pingasut mattunneqartut
Savalimmiuniit timmisartumik angalasut pingasut coronavirusimik tunillatsissimasinnaagamik Kangerlussuarmi allaniit ningorsimaarallartussanngorput. Taakkua pingasut qallunaatut innuttaassuseqarput, nunatsinni najugaqartuullutik.
Naalakkersuisut siulittasuat, Kim Kielsen(S), aamma peqqinnissamut naalakkersuisoq, Martha Abelsen (S), tusagasiortunik aggersaagamik taama oqaluttuarput.
Timmisartorsuarmut ilaasut marluk coronavirusimik tunillatsissimasinnaasut, aallaqqaammut kalerriutigineqarpoq - kisianni tassa pingasuupput. Tamanna Tunillaassortunik nappaalasoqarneranut ataatsimiititaliarsuup siulittaasuata Svend Foldagerip, KNR-imut uppernarsarpaa.
Inuit taakku pingasut coronavirusimik ilumut tunillatsissimanersut suli paasineqanngilaq. Taakku misissorneqarnerat aqagu marlunngornermi ullup-qeqqanut piariissapput.
AAMMA ATUARUK Coronavirusimik tunillatsissimasinnaasumik Kangerlussuarmi mittarfimmi pasitsaassaqartoqartoq
Taakku tunillatsissimassagunik coronavirusimik tunillatsissimasuni nunatsinni siulliussapput.
Sanilerisatillu mattunneqartut
Ilaasut pingasut peqqiilliornertik sulisunut namminneerlutik oqaatigaat. Taava timmiasartup naalagaata pisortat kalerrippai, taava nunatta nakorsaanera politiillu Kangerlussualiarput, ilaasut pingasut misissoriartorlugit paasissutissanillu katersiartorlutik.
Ilaasut pingasut timmmisartumilu sanilerisatik kisimiittusasanngorallarput. Ilaasut sinneri assigiinngitsunik marlunik tunngaveqarluni immikkoortinneqarput: ”Aarlerinaateqarnerusut” aamma ”Aarlerinaatikinnerusut”.
AAMMA ATUARUK Arctic Circle Race corona virus peqqutigalugu taamaatiinnarneqarpoq
Ilaasut Tunillaassortunik nappaalasoqarneranut ataatsimiititaliarsuarmit ”aarlerinaateqarnerusutut” nalilerneqartut angalanertik apuuffissaminnut ullut marlunngortinnagit apuussinnaagunik angalaqqissinnaapput. Tamatuma kingorna nammineq kajumissutsiminnik aninaveersaassapput.
Ilaasut ”aarlerinaatikinnerusutut” nalilerneqartut angalanertik nangeqqissinnaavaat, ersiutaasinnaasunilli nakkutinnissasut politiit tusagassiuutinut nalunaarummi paasissutissiipput.
ACR taamaatiinnarneqartoq
- Nakorsaaneq uteqqereeriarpat aqagu tusagassiortunik nutaamik katersortitseqqinnissaq naatsorsuutigaara, Kim Kielsen oqarpoq.
Statens Serum Insitut Københavnimiittoq tunillatsittoqarsimanersoq tigusinernik misissueqqissaartuussaaq.
Tunillaassortunik nappaalasoqarneranut ataatsimiititaliarsuup innersuussutini tallimanngormat nutarterpai, aaqqissuussinerillu 1000-init amerlanerusunit peqataaffigineqartut kinguartinneqarnissaat taamaatiinnarneqarnissaalluunniit maanna kaammattuutaalluni.
Canadami Arctic Winter Gamesertoqarnissaa coronavirusimik tunillaassuisoqarsinnaanissaata aarlerinarnera pissutigalugu taamaatiinnarneqartoq arfininngormat unnukkut nalunaarutigineqarpoq. Arctic Circle Racellu Sisimiuni ingerlanneqartartup tunillaassuuttoqarsinnaanera pissutigalugu aamma taamaatiinnarneqarnera ullumi nalunaarutigineqarluni.
