Assi: NASA

Ilisimasalik: Avannaarsuani sikup aakkiartornera pillugu siulittuillaqqinnerulissaagut

Issittup imartaata sikuata aakkiartupiloornera sermersiuunut tupaallannarpoq.Taamaattumik ilisimatuut sermersuup pissusaanut siulittuillaqqinnerulertariaqarput. Sermersiooq silallu pissusianik ilisimatooq Sebastian Mernild taama oqarpoq.

- Kalaallit Nunaata avannaarsuata imartaani sikueruttaleriartornera ilimagisatsinnit allaanngortitsivoq, siunissami sikueruffigisarumaagaa immaqa allamiissagunarluni, Sebastian Mernild oqarpoq. 

Silap pissusiata allanngoriartornerata kiatsikkiartorneratalu sermersuaq aatsikkiartulerpassuk, nunatta avannaarsuata sikuata kingulliulluni aakkiartornissaa ilisimatuunit maannamut ilimagineqaraluarpoq.

AAMMA ATUARUK Avannaarsuani sikup aakkiartornera kinguneqarujussuarsinnaavoq

Misissuineq pitsaanerusoq

Ukioq mannali qaqutigoortumik pisoqarnera ilisimatuunut uissuumminarmat, pisut taamaattut eqqummaariffiginerusariaqarritik, sermersiooq oqarpoq:

- Taamatut pisoqartillugu suliagut qiviaqqillugit sooq taama pisoqarneranik uagutsinnut aperisariaqarpugut, piumaartussanillu siulittullaqqinnerulerluta, tamanna qularnanngilaq. Tassami pitsaanerusumik misissuigutta avannaarsuani immap aasami qaqugukkut sikuertarnissaa siulittorumninartinnerussavarput, Sebastian Mernild oqarpoq. 

Misissuinerillu pitsaanerulerpata Avannaarsuata qaqugu aasaanerani sikoqanngilluinnarlernissaa paasineqarsinnaasoq, Mernildip oqaatigaa:

- Avannaarsua aasaanerani 2030-p 2050-illu akornanni sikoqartarunnaavinnissaa eqqaaneqartarnikuuvoq, siulitttuutti ukiut 20-t iluanni pisussaatinneqarpoq. Taamaattumik ilisimatuutut misissuinerput pitsanngorsarutsigu aasaanerani sikup qaqugu nungussimassalernissaa paasikannersinnaassavarput.

AAMMA ATUARUK Nunatta avannaarsuata sikua silap kiannerunera pissutigalugu aannerusimasoq

 

 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl