Avannaani aavariartarfik Nassuttooq saleqquneqartoq
Kommune Qeqertalimmi kommunalbestyrelsimut ilaasortaq, Kristian Jeremiassen tama isumaqarpoq.
Aquuteralaat motorikui, gummebådikut, aquuteralaat nunamut allarpassuillu aavariartarfimmut Nassuttuumut qimaannarneqarnikut, pinngortitaq ukiuni arlalinni mingutserpaat. Kommune Qeqertalip kommunalbeastyrelsiani ilaasortaq, Kristian Jeremiassen asserpassuarnik taama oqaluttuartunik takuvoq.
AAMMA ATUARUK Qulimiguulinnut Kangersuatsiami mittarfik ammaqqittoq
Taanna saliinissamut kommuninut arlalinnut Namminersorlutillu Oqartussanut ikiortiserinnilluni siornali saaffiginnippoq.
- Kommuninik allanik aamma piniartut aalisartullu kattuffiat suleqatigalugu, naalakkersuisoqarfillu suleqatigalugu siunissami aaqqiissutissanik qanoq aaqqinniarneraat, massakkut killiffissiorlugu paasiniarpara, Kristian Jeremiassen oqarpoq.
Siornali piiaqquneqalersut
Taanna siorna siunnersuuteqarmalli Kommune Qeqertalik misissuilersimasoq, borgmester Ane Hansen KNR-imut oqarpoq.
Nassuttooq kangerlungaatsiarujussuvoq. Aaffat sorliit eqqagassaqarnerunersut, eqqakkallu oqimaannerusut suup tungaaniinnerunersut misissorneqarsimasut, borgmesteri oqarpoq.
- Massakkullu eqqagassat ersarissisimalluni eqqagassat sumi annertunerunersut, iliuusissanut tunngavissagut katersoreersimalerpagut.
Taava ammma inuit kommuninit assigiinngitsuneersut tamaani aalajangersimakannernerusumut aavarfinnaaqartartut, Ane Hansen oqaluttuarpoq.
AAMMA ATUARUK Sakkutooqarfiusimasuni saliginissat aallartilerput
Taamaammat Avannaata Kommunia Qeqqatalu Kommunia suleqatiseralugit saaffigissagitik, avatangiisinullu naalakkersuisoqarfik saaffigissagitsik borgmester oqarpoq.
Kristian Jeremiassenilli kissaataata ukioq manna naammassineqarnissaa naatsorsuutigineqarsinnaanngitsoq, Kommune Qeqertalimmi borgmesteri, Ane Hansen oqarpoq.
- Aningaasartakkaajussagami aamma nuna avinngarusimagami kangerlorujorujussuullunilu, saliititsinissaq assartuussinissarlu akikinnaviannginnamik. Naatsorsuutigineruara budgetinut ilanngutereerpat aappaagu, immaqa siulliit naammassiniarneqasinnaasut.
Aningaasaliisussaqartoq
Kisianni avannaamiut aavarfinnaavanni saliinissamut atorsinnaasunik Namminesorlutik Oqartussat aningaasanik immikkoortitaqareersut, avatangiisinut naalakkersuisoq oqarpoq.
- Eqqagassalerinermut aamma avataangiisinut tunngatillugu periusissatsinnik suliaqaqqammerluta taanna akuersissutigeriigarput aallaavigalugu kommuniminngaaniit saaffigineqarutta assigiinngitsutigut suleqataasinnaaneq ammaterujussuarparput, Jess Svane oqarpoq.