Qulaarpaa Avammut nioqquteqarneq Nunatta annassutissaraa
![](/sites/default/files/styles/image_934x467/public/article_images/martin_kviesgaard_groenlandsbanken_2012-08-17_1.jpg?itok=Gy2-yunR)
Nunarput ukiuni aggersuni aningaasaatikinnerulissaaq. Isertitat amerlineqanngippata taama ilimasaarisoqarpoq.
Aatsitassarsiornermit isertitassat neriuutigineqarsimasut maannamut suli piviusunngunngillat, tunniutiinnartoqartariaqanngilarli, Grønlandsbankenimi pisortaq, Martin Kviesgaard, taama oqarpoq, taannami suli neriuuteqarpoq.
Aatsitassarsiorneq suli periarfissaqarpoq
- Aatsitassarsiornermi periarfissat suli periarfissaapput. Maanna aatsitassarsiorneq ajornakusooraluarpoq, maannamulli aatsitassarsiornermik misiliisut ikissimammata siunissami suli periarfissaavoq. Tassuuna uteriinnissaq pingaaruteqarpoq, Grønlandsbankenimi pisortaq, Martin Kviesgaard oqarpoq.
Suliffissuit pioreersut ineriartortinniarlugit politikerit eqqarsaateqarneri nuannaarutigaa.
Aalisarneq takornariaqarnerlu periarfissaqarput
- Aatsitassarsiornerup saniatigut aningaasarsiorfigissallugit pikkoriffigeriikkagut, tassa aalisarneq takornariartitsinerlu, suli ineriartortinneqarsinnaapput, Kviesgaard oqarpoq.
SIK-p siulittaasuanut Jess G. Berthelsenimut pingaarnerpaavoq ilaasortami suliffissaqarnissaat. Taamaattumillu aserfallatsaaliuinermik sulinissaq aallartisikkusuppaa, SIK-lli siulittaasuata erseqqissarpaa avammut nioqquteqarnerup ineriartortinnissaa kisimi naammanngitsoq.
Sanaartorneq aaqqiissutaanngilaq
- Eqqaamassavarput sanaartorneq imminermini ajunngilaq, aserfallatsaaliineq imminermini ajunngilaq, kisianni aningaasanik nutaanik pilersitsinngilaq, Jess G. Berthelsen oqarpoq.
Taanna isumaqarpoq Kalaallit Nunaat nunanut allanut nittarsaanneqarnerussasoq, taamaalillunilu takornarianik amerlanernik tikittoqarnerusalissalluni. Nunatsinnullu missinnaanissaat kisimi naammanngilaq.
- Mittarfiliorneq naammanngilaq, mittarfiimmi atorneqartariaqarput, Jess G. Berthelsen oqarpoq.
Mittarfiit naammanngillat
Mittarfiit imminut akilersinnaassappata takornariat amerlanerit nunatsinnukartarnissaat isumagineqartariaqarsoraa, tamannalu aamma SIK-p ilaasortaanut pitsaassaaq.
- Tassa tassani sulilersinnaapput. Takornariaqartitsinermi, akunnittarfinnilu. Takusinnaavarput Ilulissani Hotel Arcticimi takornariaqarluartartumi sulisut 99,9 procentii nunatsinneersuusut. Tassa taamaaliussaagut, tassa isumaqarpunga ilaasortagut takornariaqartitsinermi siunissami suliffissaqassasut, Jess G. Berthelsen oqarpoq.