Avaleraasartoorniarneq siornamit ingerlalluarnerungaatsiartoq

Nunatta kangiata imartaani avaleraasartoorniarneq ingerlalluarpoq.

Ukiormi kingullermit ajunnginnerungaatsiarpoq, siornami silap pissusia immallu kissassusia avaleraasartoorniarnermut pakatsinangaatsiarsimavoq.

Ulloq aggustip arfineq pingajuani ukioq manna pisarineqartut 29.000 tonsit missaanniipput, ukiorlu kingulleq piffissap taamaalinerani 19.000 tonsiinnaasimallutik.

Taamaakkaluartorli ukiumi angusarissaarfiunerpaamit 2014-imit suli ikinnerungaatsiarput, taamanikkummi 38.000 tonsit sinnerlugit pisarineqarsimasut, Kalaallit Nunaanni Aalisarnermut Akuersissutinik Nakkutilliisoqarfimmit oqaatigineqarpoq.

2014-imi avaleraasartoortarineqartut katillugit 78.000 tonsiupput.

Sila atoruminariarpat sapaatit akunneri sisamat tallimallu akornanni suli avaleraasartoorniartoqarsinnaasoq, akuersissutinik nakkutilliisoqarfimmi AC-fuldmægtigip Petur Meinhard Jacobsenip nalunaarutigaa.

Taamaattoqassappallu avaleraasartoortassat 50.000-it 55.000 tonsillu akornaniissasut naatsorpaa, ukiumullu pisassiissutigineqarsimasut 85.000 tonsiupput.

Taamaaginnassagunilu Naalakkersuisut Aningaasaqarnermut inatsimmut ukioq mannamut ukiumullu 2017-imut missingersuutigisaat assigipajaassavaat, avaleraasartuunillu akitsuusiinikkut isertitassat 49 millioniussasut naatsorsuutigineqarpoq.

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat