Politikki Inuussutissarsiutit

Avaleraasartoorniarneq iluatsiffiunngitsoq pakatsissutaasoq

Tunup imartaani avaleraasartoorniarneq unippoq. Aalisarnermik akuersissutinik nakkutilliisoqarfimmiit KANUAANA-mit uppernarsarneqarpoq. Illuatungiliuttulli tamanna pillugu nalorninngilluinnarput.

Allattoq Nauja Møller

septembarip 03-at 2015 19:23

Nunatta karsianik qulakkeerneqanngitsumik aningaasanoortoqarpoq, maanna taamak isikkoqartillugu iluatsitsisoqarnavianngilaq.

- Aningaasanut inatsimmi aningaasanoorpugut. Tamanna ilinniarfigisariaqarparput, taamaattumik uagut oqarpugut amigartoorfiit akileraarutinik matuniartinnagit ingilluta ajornartorsiutit pissutsit piviusullu qiviarlugit oqallitta, Naaja Nathanielsen taama oqarpoq.

Aamma atuaruk Illuatungiliuttut: Avaleraasartuut isumalluutigivallaarnagit

Aalisarnermut akuersissutaatinik nakkutilliisoqarfimmi pisortap Mads Nedergaardip avaleraasartoorniarnerup unitsinneqarnera ammassassuarniarnermullu sangutinneqarnera uppernarsareeraalu Naaja Nathanielseni taama oqaaseqarpoq.

Inuit ataqatigiinniit aningaasaqarnermut ataatsimiitsitaliami ilaasortap neriuutigaa aningaasanik isaatitsivissatut siunniunneqarsimagaluartut ajutoornerisa naalakkersuisut silattuaqissutigissagaat:

- Tamanna inuiaqatigiinnut oqariartuutaavoq ilinniutaasussaq, tassa aningaasanik isaatitsivissanik taamaattunik ilimagisaqartassanngitsugut taavalu aningaasanut inatsit imminut ataqatigiittoq pilersinneqassappat sulilluarnerusariaqartugut aningaasanut isaatitsivissat ajutooriaannaat upperiunnaarlugit,Naaja Nathanielsen oqarpoq.

Aamma atuaruk Steen Lyngep aningaasanut inatsit piviusorsiornerusoq kissaatigaa

Maannamut avaleraasartuut 2015-mi qaqinneqartut 30.000 tonsit missaanniipput. Naalakkersuisulli aningaasanut inatsimmik allassimasaanit pingajorarterutaannaallutik. Nunattami karsianut missingersuussutigineqaraluarpoq avaleraasartuut 85.000 tonsit qaqinneqassasut taakkuli 81 million koruuninik nunatta karsianut isertitsissutaajumaarlutik.

Aamma atuaruk Avaleraasartoorniarnermit isertitassaagaluit amigaataalerput

Nunattalu karsianik imassaaleqeqisumut avaleraasartoorniarnermit isertitassat pingajorarterutaannaanik isertitaqarnissaq inuiaqatigiinnut tusarliussaavoq pitsaavallanngitsoq, Naaja Nathanielsen isumaqarpoq.

- Taamattumik aningaasanut inatsit 2016-nimoortoq misissortariaqalerparput. Tamassumalu ataqatagiinnera misissoqqissaarneqartariaqarpoq aamma piviusorsiornertuunersoq qanorlu iliortoqarsinnaanera misissorlugu, Naaja Nathanielsen aningaasaqarnermut tunngasunut Inuit Ataqatigiit oqaaseqartartuat taama oqarpoq.

Naalakkersuisunit ullumikkut oqaaseqartitsiniarsimanerput iluatsissimanngilaq.