Avalaap politikerinit ilumoorunneqarnerunissani kissaatigaa
Tamassumalu pitsaanerulernissaa ilaatigut siunertaralugu, kalaallit Danmarkimi ilinniagaqartut kattuffiata, Avalaap, Savalimmiormiut Danmarkimi ilinniagaqartut kattuffiat, MFS suleqatiginialerpaa.
Ataatsimeeqatigiinnermi siullermi eqqartorneqartut pingaarnerit ilagaat, Nunatsinni qinersisoqassatillugu ajornartorsiutaasartut annersarikkajuttagaat, tassa qinersinissamut qinnuteqaatit kingusinaartumik ilaatigut Nunatsinnit nassiunneqartarneri. Tamanna pillugu Avalaap siulittaasua, Hans Peder Kierkegaard ima oqarpoq.
- Maannakkut iliuuserineqartartoq ajunngikkaluarpoq, kisianni piviusoq imaappoq, kommunit ataasiakkaat assigiinngitsunik iliuuseqartarmata, ilaasa allakkatigut taasinissamut qinnuteqaatit akisarpaat allagaannartigut ilaasa e-mail atorlugu akisarlutik. Ilinniartut arlallit, aatsaat qinersineq qaangiuttoq qinnuteqaataat akineqartarlutik. Tamannalu allanngortinneqartariaqarsoraarput.
Hans Peder Kierkegaardillu ajornartorsiut tamannaannaannginnerarpaa, aamma qinersinissaq sioqqullugu Nunatsinni qinigassanngortittut Danmarkimi ilinniartunut qineqqusaartartut ikippallaaneri allanngortinneqaratariaqarsoraa, Savalimmiormiut ilinniartut atugarisaannut assigusunngorlugu, Hans Peder Kierkegaard tamanna pillugu ima oqarpoq.
- Ukioq manna Nunatsinni qinersisoqarnerata siuninngua maani Danmarkimi oqallitsitsivugut, Savalimmiormiunulli naleqqiullugu annikinnerungaartumik, tassa taakku politikeriisa partiinut siulittaasui tamarluinnarmik, Danmarkimi ilinniartuutiminnut qineqqusaarmata allaat Savalimmiunit tusagassiortorpassuarnik malitseqarlutik. Uagullu maanna pilersaarutigilerparput, Savalimmiormiut ilinniartut misilittagaat aallaavigalugit, politikerinik aggersaasalerniarluta, naak aqqutit akisuukasiugaluartut.
Danmarkimi kalaallit ilinniagaqartut kattuffiata siulittaasua, Hans Peder Kierkegaard taama oqarpoq.
Kalaallit Danmarkimi ilinniagaqartut, januaarip aallaqqaataanit aallarnersumik ilinniagaqarnersiutaat Danmarkimit tiguneqarput, tamannalu kalaallinit ilinniartunit aallaqqaammut isumaqatigineqarsimanngeqaaq, maanna iluarineqarnerulersimasoq Hans Peder Kierkegaardip oqaatigaa.
