Australiap ministeriunera nunaqqatiminit assuarineqartoq
Cobargomi inuit pingasut ajunaarsimasut siusinnerusukkut nassaarineqarput, ministeriunerlu Scott Morrison tikeraarmat innuttaasunit akerliuffigineqarpoq, biilimullu qimaasariaqarsimalluni.
Scott Morrisonip innuttaasut ilaata ilassiniarsarigaa videoliami takuneqarsinnaavoq, aperivorlu qanoq innersoq.
Innuttaasut taamaalimmat suaartalerput, Morrisonilu biiliminut qimaasariaqarsimalluni.
- Pisassani pivaa, tamaani politikerit ilaat Andrew Constance, Australiami TV-qarfiit ilaannut 7 Newsimut oqarpoq.
Australiami aamarsuarnik piiaasoqarsinnaanissaa Morrisonip tapersersorpaa. Aamarsuarnik piiaasarnerup silap pissusiata allanngoriartorneranut pissutaaqataalluinnarnera oqaatigineqartarpoq, tamannalu ilaatigut pissutaalluni assersuutigalugu panernersuaqarneranut pissutaaqataasorineqarluni.
AAMMA ATUARUK Orpippassuit ikuallannerat pissutaallutik Sydneymi anersaartorniarneq ajornangajattoq
Silap pissusiata allanngoriartornerata akiorniarneqarnissaanut iliuusissat, orpippassuit ikuallannerisa nalaanni Australiami naalakkersuisunit oqaluuserineqassanngitsoq Scott Morrisonip siusunnerusukkut oqaatigereerpaa.
Cobargomili innuttaasut kamannerat inuttut nammineq ajorusuutiginnginnerarpaa:
- Innuttaasut kamapput aliasullutillu. Uannillu assuarinnikkaluarpata, pissutsillu massakkut atuuttut eqqarsaatigalugit suliassama pingaarnersaat tassaavoq tapersersussallugit, Scott Morrison, radiomut 3AW-mut oqartoq, aviisip Sydney Morning Heraldip allaaseraa.
