Orpippassuit ikuallannerat pissutaallutik Sydneymi anersaartorniarneq ajornangajattoq

Orpippassuit ikuallanerisa kingunerisaanik Australiami illoqarfiit annersaanni Sydneymi silaannaq mingutsinneqaqaaq, ullut sisamassaat taamaalluni.

Kiappallaarunnaarnerata kingunerisaanik ikuallannerit qamikkuminarsisikkaluaraa, Australiap kangimut kujasissortaani qatserisartut ikuallannerpassuarnik qamisaajuartuarsinnarput.

Assi © : Stringer/Reuters/Ritzau Scanpix

Ministeriunerup, Scott Morrisonip ikuallannerit taassumalu konservatimini naalakkersuisuni politikkiata akornanni matumani aamarsualiorfissuit ilanngullugit atassuteqannginnerarpaa. Assi: Stringer/Reuters/Ritzau Scanpix

Sydneyp eqqaani orpippassuit ikuallannerat pissutaalluni silaannaap mingutsinneqarnerata malitsigisaanik, Sydney nunarsuarmi illoqarfiit mingutsinneqarnerpaat qulit akornanni inissisimalerpoq.

Inuit Sydneymi sulisut, meeqqallu atuartut, anersaartorniarnerminni illersuusersimapput.

Ministeriunerup silap allanngoriartorneranut attuumassuteqannginneraraa

Australiap ministeriunerunera Scott Morrison ajornartorsiuleruttorfiup nalaani kimigiiserfigineqalerpoq. Silap pissusiata allanngoriartornera Australiami naalakkersuisunit annerusumik iliuuseqarfigineqarsimannginnera, isornartorsiuisut oqaatigaat.

Australiami naalakkersuisut politikkiat Australiamilu orpippassuit ikuallannerat imminnut attuumassuteqanngitsut, ministeriunerup Scott Morrisonip oqaatigaa.

Australiami naalakkersuisut aamarsuarnik piiaasoqarsinnaanissaa tapersersorpaat, tamannalu ilaatigut pissutaalluni silap pissusiata allannngoriartorneranut isornartorsiuisunit pissutaaqataatinneqarlutik.

Assi © : Stringer/Reuters/Ritzau Scanpix

Nunap immikkoortuani New South Walesimi sapaatit akunnerini marlunni ikuallattoqarpoq, sulilu 55-it ikuallallutik. Assi: Stringer/Reuters/Ritzau Scanpix

/ritzau/Reuters