Australiap innuttaasuisa affai coronap tuniluunnera pillugu mattunneqartut

Australiami innuttaasut amerlanerpaat coronap tuniluunnera pillugu mattunneqarput. Taamaakkaluartorli Australiami nunap ilarujussuani corona tuniluutingaatsialerpoq.

Australiap kujasissortaani naalagaaffik 1,7 millioninik inulik ullumi pingasunngornermi matuneqarpoq.

Taamaalillunilu Australiap inuisa affai sinnerlugit corona kingunerisaanik mattunneqarnermikkut killilersuiffigineqangaatsialerput.

Taamaakkaluartorli Australiami nunap naalagaafferujussuisa ilaanni Victoriami aamma New South Walesimi najugallit inuit arlalippassuit coronamik tunillanneqarsimapput.

Illoqarfissuup Sydneyp ilaaniittumi New South Walesimi ullumi pingasunngornermi inuit 110-t tunillanneqarsimapput, ippassaq 78-iusimagaluartut.

AAMMA ATUARUK Inuit millionillit illoqarfik Sydney qimaqqusaajunnaaraat

Illoqarfissuarmilu Victoriami ullumikkut pingasunngornermi inuit 22-t tunillanneqarsimapput, ippassaq marlunngornermi qulingiluuasimagaluartut.

Australiami oqartussat taakkunani naalagaaffinni marluusuni sapinngisaq tamaat atorlugu tuniluuttoqassanngitsoq siunertarigaluarpaat.

Australiami coronamik pinaveersaartitsinermi iluarisimaarneqarluartumik programmiliorluarsimaneq pissutigalugu ukiup ataatsip ingerlanerani tuniluunneq minnerpaaffimminiissimagaluarpoq.

Australiami inuttaasut 11 procentii tamakkiisumik akiuussuserneqarsimapput.