Australiamiut tusintilikkuutaat ullormut nalliuttorsiutigineqartartumut akerliussutsimik takutitsisut
Inuit tusintilikkuutat Australiami illoqarfissuarni arlalinni akerliussutsimik takutitsiniarlutik tallimanngornermi katersuupput. Taakkua ullormut nalliuttorsiorfimmut Australia Dayimik taaguutilimmut akerliunertik takutinniarpaat.
Australiap nunasiartaarineqarnera nunallu inoqqaavisa toqorarneqarnerat ullormi malunnartinneqartartumi nalliuttorsiutigineqartartut, akerliusut isumaqarput.
Australiami tusagassiorfik ABC taama allappoq.
Ulloq ukiut tamaasa januaarip ulluisa 26-anni malunnartinneqartarpoq.
"Invasion Day" imaluunniit "Survival Day"
Tuluit sakkutuuisa imarsiortut Sydneymik maanna ilisimaneqartumut parnaarussanik inissiisarfimmik pilersitsiniarlutik 1788-imi januaarip ulluisa 26-anni tulammata, Australiap pilersinneqarnera ullormi tassani nalliuttorsiutigineqartarpoq.
Nunap inoqqaavinik tapersersuinermik takutitsiniarluni, ulloq Invasion Dayimik imaluunniit Survival Dayimik Australiamiorpassuarnit maanna taaneqartarpoq.
