Australiami kiattup anorersuaqarnerata kingorna qarsutsinersuaqartoq

Australiap avannaatungaani naalagaaffimmi Queenslandimi innuttaasut tusintinik arlalinnik amerlatigisut sumiiffinnut qutsinnerusumukarnissaannik oqartussaasunit kaammattorneqarput.

Siallerujussuarnerata kingorna qarsutsisoqarsinnaanera pillugu innuttaasut qutsinnerusunukaqquneqarput.

Queenslandimi sapaatit akunnerata aallartinnerani kiattup anorersuanik anorersuarpoq.

Australiami silasiortut silap qanoq innissaannik ilimasaaruteqarnerat naapertorlugu 1971-mi qarsutsisoqarnerpaanera 4,1 meteriusoq sapaammi qaangerneqarsinnaasoq 

Queenslandimi innuttaasut 10.500-it missaannik amerlatigisut angerlarsimaaffii sarfaqanngillat. Queenlandimi ministeriuneq Steven Miles taama oqaluttuarpoq.

Taassuma ilanngullugu oqaluttuaraa, Queenslandip avannaata kangianiittoq mittarfik Cairns matuneqartariaqarsimasoq.

- Innutaasut tassani najugaqartut oqaloqatigigakkit taakkua oqaluttuarput aatsaat taama siallertigitillugu siornatigut misigisaqarsimanatik, Steve Miles oqarpoq.

Ulorinartoq ajunaartoqarsinnaasorlu

Silasiortoq Laura Boekel oqarpoq, Queenslandimi sumiiffinni assigiingitsuni ullup unnuallu kingulliup ingerlanerani  600 millimeterisut annertutigisumik siallersimasoq. 

Akunnerit 24-it tulliuttut ingerlaneranni 500 millimeterisut annertutigisumik siallersinnaasoq silasiortup taama ilimasaarutigaa. 

- Qarsutsinerit ulorinarput ajunaartoqarsinnaallunilu, qarsutsinerit sukkasuumik takkussinnaammata, Laura Boekel tusagassiortunik katersortitsinermi taama oqarpoq. 

Shane Chelepy, Queenslandimi politikommisærip tullersortaa taanna oqaluttuarpoq, annaassiniartoqarsimasoq aamma arlalinnik qimagussortitsisoqartoq. 

Ajunaartoqarsimaneranik taammaasaqartoqarneranillu nalunaaruteqartoqarsimanngilaq. 

Angerlarsimaffiit arlaqartut qarsutsiffigineqarsimasut Shane Chelepy oqarpoq, qassiunerili taassuma taanngilai, AFP taama allaaserisaqarpoq.