Australiami coronavirus pissutigalugu matoqqatitsigallarnerit sivitsorneqartut
Australiap ministeriunerata Scott Morrisonip coronavirus nunaminni siaruatsaaliorniarlugu matoqqatitsigallarnerit sivitsorneqartut innuttaasunut nalunaarutigaa.
Nutaarsiassaqartitsivik Reuters naapertorlugu Scott Morrison Australiami tusagassiortunik pingasunngornermi ullaakkut katersortitsinermi taama nalunaaruteqarpoq.
Taamaammat Australiami innuttaasut qaammatini arfinilinni matoqqatitsisorallarnissaa sillimaffigissavaat, Morrison oqarpoq.
Australiap peqqinnissaqarfiani qullersap, Brendan Murphyp sapaatit akunnialuinnarni matoqqatitsisoqarallarnissaa naammannginnerarpaa.
- Immikkut ilisimasalittortatta arlaannaataluunniit sapaatit akunnerit marluk sisamaannaallu akornanni sivisussusilimmik matoqqatitsisoqarallarnissaa innersuussutiginngilaa. Taama sivikitsigisumik matoqqatitsigallaraluarutta iluaqutaanavianngimmat sivisunerusumik matoqqatitsigallartariaqarpugut, Murphy oqarpoq.
Australiami naalakkersuisut matoqqatitsigallarnernik pingasunngornermi sivitsuinerat ilaatigut filmertarfiit, imerniartarfiit neriniartarfiillu inuit 100-nit amerlanerusut katersuuffigisinnaasaat matuneqarallarnerannik kinguneqarpoq.
AAMMA ATUARUK New Zealandimut takornariat piumasaqaatinik malinninngitsut nunamit anisitaasalissasut
Australiami killeqarfiit naalakkersuisuinit aamma matuneqarput, Australiameersullu nunami allamiittut angerlarnissaminnut Morrisonimit kajumissaarneqarlutik.
- Tunillatsissimanermut aarlerinaateqarnerusortavut tunillatsissimasortattalu amerlanerpaartai nunami aarlerinaatilimmeereerlutik nunatsinnukaqqissimasuupput, Scott Morrison oqarpoq.
Australiamili atuarfiit matuneqarallassanngitsut Australiamilu angalaneq aarlerinanngitsoq, ministeriunerup aamma nalunaarutigaa.
Silami aaqqissuussat inunnit 500-nit amerlanerusunit peqataaffigineqartut ingalassimanissaat, Australiami innuttaasunut kajumissaarutigineqartuarsinnarpoq.
Coronavirusimik tunillatsissimasutut Australiami maannamut nalunaarsukkat 450-init ikinnerunngillat. Taakkua ullormiit ullormut amerliartortuarsinnarput. Coronavirusimik toqqutillit maannamut tallimaapput.
