NUIKI Atukkat aalajangersimasut meeqqat atuarfiata naammassilluarneranik kinguneqartarput
-Angajoqqaarpassuaqarpoq meeqqaminnut asannittunik aammali angajoqqaarpassuaqarpoq meeqqamik arlaatigut ajornartorsiuteqaleraangata imaluunniit naqqissorneqarnissamut pisariaqartitsileraangata qanoq qisuariarnissaminnut ilisimanninngitsunik. Tassanilu uagut inersimasutut akisussaaffeqarpugut annertuumik.
Palle Lennertip eqqartugaa tassaavoq angajoqqaat meeqqaminnut aalajangersimasumik atugaqartitsinissaat, soorlu piffissami aalajangersimasumi innartarneq, naammattumik sinittarneq, piffissani aalajangersimasuni angerlartarneq, ullaakkorsioqatigiittarneq taquartarnerlu, angerlarsimaffimmi suliassaqartarneq, ilinniakkerisarneq atuariartortarnerullu pingaartinneqarnera. Taama atugaqartitsigaanni angajoqqaat ilinniarluarsimassusaat apeqqutaaneq ajorpoq.
AAMMA ATUARUK Bygdeforældre skal støtte deres børn til uddannelse
Namminersorlutik Oqartussat ilinniartitaaneq pillugu 2015-imi pilersaarutaanni allassimavoq ukiut 20-t ingerlaneranni meeqqat atuaffiannit naammassisartut 70 %-iisa ilinniakkamik inuussutissarsiutaasinnaasumik naammassisaqarsimanissaat. Anguniakkap tamatuma angunissaanut maanna ukiut arfineq-marluinnanngorput, tamannalu pivisiusorsiortoq Palle Lennert isumaqarpoq:
-Meeqqat atuarfianni ajornartorsiutit aporfilersuutillu eqqartulerutsigit iliuuseqarfigalugillu anguakkap angunissaa piviusorsiorsinnaavoq. Sinerissami atuarfippaaloqarpoq eqqummaarinnittunik takusinnaasatsitut angusativut kusanartunik kinguneqartitsisartunik.
AAMMA ATUARUK Nunaqarfimmi inuusuttut ikorfartorneqarput
NUIKI-mi siunnersortit pisortaat Palle Lennert taama oqarpoq. NUIKI, tassaavoq Nunaqarfinni Ilinniartitsinermik Kivitsineq, nunaqarfinni meeqqat atuarfianni atuartut misissuiffigalugillu ilisimatusarfigisarpaat, Namminersorlutik Oqartussanillu ukiumut 3 million koruuninik aningaasaliiffigineqartarpoq. Ilanngutassiaq Thora H. Nielsenimit suliarineqarpoq.
