Atuartut pinngortitamut eriaginninnermut sungiusarneqartut
- Eqqakkat imaaniitiinnarneqarunik imaluunniit pinngortitamiitiinnarneqarunik qanoq tamanna pinngortitamut kinguneqassava?
Apeqqut taanna eqqartugassallu allat pinngortitamut avatangiisinullu tunngassuteqartut Atuarfik Mathias Storchimi atuartut 95-it aamma Perorsaanermi Ilinniarfimmi perorsaasunngorniat, inunnik isumaginninnermi ikiortinngorniat kiisalu socialassistentinngorniat 63-it sapaatip akunnerani uani akissutisiniarsarissavaat.
Suliniummi, arlalinnit peqataaffigineqartoq, 'WWF Kangia Kids', meeqqat avatangiisinut ilisimasaqarnerulernissaannut siunertaqartoq, Ilulissani ulluni makkunani ingerlanneqaqqippoq.
Suliat saqqummersinneqassasut
Atuartut aamma ilinniakkani pingasuni ilinniartut qulequttat tallimat aallaavigalugit sammisassaqarlutillu eqqartuisassapput. Qulequttat pineqartut tassaallutik silaannaap allanngoriartornerata pissusaa, eqqakkat atoqqiinerillu, eqqakkanik immikkoortitsinerit, nunami immamilu eqqakkat kiisalu silaannaq naasullu.
Atuartut ilinniartullu sammisaqarnertik naggataarlugu suliaminnik Ilulissani heliportikup eqqaani Sermermiuni tallimanngornermi saqqumersitsissapput.
Pinngortitaq pillugu nunarsuaq tamakkerlugu suliniaqatigiiffiup, WWF-ip, Ilulissani Kangia pillugu allaffiup aamma Perorsaanermik Ilinniarfiup suliniut ”WWF Kangia Kids” 2014-imi aallartitaat ukiat tamaasa ingerlanneqartarpoq.