ASSIT Atuartut Niaqornaarsumeersut Folketingimeeqqammerput
Atuartut 179-it ippassaq Folketingimiipput, politikeritullu ulloq ataaseq sulillutik. Taakkunannga marluk Niaqornaarsummi Atuarfik Kristian Lundbladimi atuartuupput.
- Kalaallit Nunaanneersunik Savalimmiuneersunillu peqataasoqarnissaa neriuutigigaluarpara, paasigakkuli uanga Mikaelilu taamaallaat peqataasussaasugut tupaallaatigaara, Kimmernaq Steenholdt, tusagassiuutinut nalunaarummi, Inuit Ataqatigiit Folketingimi allattoqarfianneersumi ilaatigut oqarpoq.
Aamma atuaruk Inuusuttut Inatsisartui 2015 iluatsilluartoq
Oqalugiarnissaminut pissangasoq
Qimaasut pillugit Nunatsinni Danmarkimilu politikkissamut siunnersuut taakku saqqummiuttussaavaat, politikerivittut ullormi tassani sulisussaallutik, tassa ataatsimiititaliani sulineq, oqaaseqartartutut misiliissallutik, taasisartussaallutik, ministerinullu tallimanut apeqquteqarsinnaassallutik, soorlu aamma ministeriuneq Lars Løkke Rasmussen, ministerit arfinilissaattut apeqquteqaateqarfigineqarsinnaalluni.
Inuit Ataqatigiit ilaasortaatitaata Aaja Chemnitz Larsenip Folketingip neriniartarfiani, Snapstingetimi, ulloqeqqasiortitsivoq, Mikael Petersenilu Kimmernaq Steenholdtilu Folketingip oqaluttarfianit aamma oqalugiarlutik.
Aamma atuaruk Nerrivimmi arsaarartartut inuusuttut AWG-mut piareersarput
Snapstingimi ulloqeqqasiorneq
- Inatsisissatut siunnersuutit siunnersuutigineqarnerannit inatsisitut atuutsinneqalernerannut suliap ingerlarnga inuusuttut piviusorsiorpalaartumik paasisaqarfiginerulersinnaammassuk periarfissatsialaavoq, inatsisimmi Nunatsinnut pingaarutillit aalajangiiffigineqartarnerat paasisaqarfiginerulaarpaat, inatsisimmi Kalaallit Nunaannut pingaarutillit amerlasuut Folketingimi suli aalajangiiffigineqartarmata, Aaja Chemnitz Larsen oqarpoq.