Inuusuttut Inatsisartui 2015 iluatsilluartoq
Inuusuttut Inatsisartuisa ukiormanna ataatsimiinneranni pingaarnertut sammineqartoq tassaavoq "Inuusuttut akornanni suliffissaaleqineq: Inuusuttut suliffissaqannginnerannik ajornartorsiut annertusiartortoq qanoq iliuuseqarfigisinnaavarput?"
Ataatsimiinnermi oqaluuserisassani siunnersuutit 20-usimapput allannguutissatullu siunnersuutit 14-usimallutik, taakkunannga siunnersuutit 16-it naggataatigut akuersissutigineqarlutik. Inatsisartut Allattoqarfiat tusagassiorfinnut nalunaaruteqarluni taama ilisimatitsivoq.
AAMMA ATUARUK Inuusuttut Inatsisartuisa inuusuttut akornanni suliffissaaleqineq sammissavaat
Inuusuttut Inatsisartuisa naapisinneqartarneranni siullermeerutaasumik ataatsimiinneq malitseqartinneqarpoq partiit Inatsisartunut ilaasortaatitaqartut sinniisaannik oqalliseqateqarnermik. Tamatumani inuusuttut assut apeqqutissaqarsimapput, partiillu sinniisaasa piffissap killeqarnerujussua pissutigalugu apeqquterpassuit tamakkerlugit akissuteqarfigisinnaasimanagit.
Inaarutaasumik nalunaarut tunniunneqarpoq
Inaarutaasumik nalunaarutip Inatsisartut siulittaasuannut Lars-Emil Johansenimut Naalakkersuisullu siulittaasuannut Kim Kielsenimut tunniunneqarneranut atatillugu aaqqissuussineq peqataasunit assut iluarisimaarneqarpoq.
Inuusuttut Inatsisartuinut ilaasortaq 21-nik ukiulik Aqqalooraq Joelsen Qaqortumeersoq ippassaq unnukkut Hans Egedep Illuani peqataasunit allanit nuannaarutigineqaqisumik inaarutaasumik nalunaarummik tunniussisuuvoq. Peqataasunit inuusuttut 25-it Nuup avataaneersuupput.
Inuusuttut Inatsisartuinit inaarutaasumik nalunaarut nittartakkami www.inu.gl-imi atuarneqarsinnaavoq, tassani aamma Inuusuttut Inatsisartuisa ataatsimiinnerat takoqqinneqarsinnaavoq paasissutissallu attuumassutillit allat nassaarineqasinnaallutik.
