AWG2016 Atuartut AWG-qarnerani sammisassaqartinneqassapput

AWG-mik aaqqissuisut atuartut arlalissuarnik sammisaqarsinnaanerat isumagisimavaat. Aaqqissuussinerit immikkuullarissut sammisassaqarfiusinnaasut akeqanngitsut, atuartut pissanganartumik misigisaqarfigisinnaavaat.

Sammisaqaqatigiilluni sulliveeqqat, atuartut akunnerpaalunni ullut tamaasa sammisamik aalajangersimasumik sammmisaqarfigisinnaavaat. Imaluunniit arlaannik misilissimanngisaminnik atuarfinni allani atuartut allat peqatigalugit sammisaqartinneqarsinnaallutik.

Eqqumiitsuliortut 60-it, nipilersortartut, timersortartut, isiginnaartitsisartunngorniat allarpassuillu AWG-qarnerata sapaatip akunnerani, marsip arfineq aappaaniit qulingata tungaanut, namminneq kajumissutsiminnik peqataasunik sammisassaqartinneqassapput.

Atuartut ilaatigut Small Time Giants imaluunniit, inuusuttoq nuannarineqartoq, Nikolaj Lønstrup Qaqortumeersoq peqatigalugu nipilersornermik ilinniarsinnaapput.

Aamma atuaruk Arctic Winter Games angerlarsimaffinnit ima malinnaaffigisinnaavat

Nunatta Isiginnaartitsisarfiani isiginnaartitsisartunngorniat kiinarpaliornermik, qilaatersornermik, Nunatta, Issittullu sinneranik piorsarsimassusaannillu ilinniartitsissapput.

Issittumi timersuutit, Arctic Sport, Dene Games, qajartorneq, qitinneq, assilialiorneq, filmiliorneq allarpassuillu sammitinneqarumaarput.

- Nuannaarutigingaarparput timersorneq piorsarsimassuserlu pillugit periarfissarpassuit ilinniartitsissutigineqarsinnaammata, General Manager, Maliina Abelsen oqarpoq.

Atuartut sammisassaqartitsinernut immersugassanik tunisinnikuupput, taakkulu kingusinnerpaamik tallimanngornermi februaarip 19-ani tunniutereersimassapput, AWG-mi piorsarsimassutsikkut sammisassaqartitsinermi akisussaasuusoq, Ruth Montgomery ilisimatitsivoq.