Atuarfiup silaannalungaatsiarnera peqqutaalluni matugallarneqartoq
Angajoqqaat, atuartut ilinniartitsisullu Nanortalimmi atuarfiup piffissami tulliuttumi matoqqanissaanik ullumi marlunngornermi allagarsipput.
Kommune Kujalleq tusagassiutinut nalunaarummi ullumi marlunngornermi ualisoq allappoq. Atuarfiup matunera matoqqagallarnerusoq ilanngullugu allappaat.
Nanortallip Atuarfiata matugallarneqarneranut silaannalungaatsiarnera kiassaatilunneralu peqqutaasut, inerisaanermullu ingerlatsivimmit atuarfiup oqoqarsinnaanera misissorneqassasoq aalajangiunneqarpoq kommunip paasissutissiissutigaa.
Atuarfiup matugallartariaqalernerata kinguneranik atuartut tamarmik aqagu pingasunngornermiit immikkut sammisaqarlutik timersortarfimmi atuartinneqassapput.
Atuartut, angajoqqaat ilinniartitsisullu ilungersunartumik pisoqarnerani suleqatigiilluarnissaat kommunimit neriuutigineqartoq, tusagassiutinut nalunaarummi allaqqavoq.
Nanortallip Atuarfiata qanoq sivisutigisumik matoqqagallarnissaa Kommune Kujalliup tusagassiutinut nalunaarutaani allaqqanngilaq.
