Atuarfiup iluarsaannissaa kinguartippaat
Qaqortumi Tasersuup Atuarfiata nutarterneqarnerata 38 millionit koruuninik akisunerulersimaneranik tamanna pissuteqarpoq.
Aviisi Kujataamiu Kommune Kujalliup nittartagaatigut aamma atuarneqarsinnaasoq taama allaaserisaqarpoq.
- Kommune Kujallermi soorunami tamanna uggoraarput. Isumaqatigiissut taanna allatut ajornartumik akuerisariaqarsimavarput Kommune Kujalliup nammineerluni Tasersuup Atuarfiata iluarsarnerata akitsornerujussua nammassinnaanngimmagu, isumaqatigiissutigineqarlunilu aningaasarpassuit taakku Namminersorlutik Oqartussat akilissagaat, Kommune Kujallermi Atuartitaanermut meeqqeriveqarnermullu ataatsimiititaliami siulittaasoq Kaj Lyberth oqarpoq.
Taamaakkaluartoq kommunalbestyrelsi imminut pisussaaffilerpoq Narsami atuarfiup atuartunut sulisunullu peqqissutsikkut aarlerinartuunnginnissaa qulakkiissallugu.
Teknikkeqarnermut ingerlatsivik suleqatigalugu atuarfiup ukiuni tulliuttuni pingaarnersiuilluni iluarsarneqarnissaa misissorneqassaaq, suliarineqarnissaalu isumagineqassalluni.
- Taamaaliornitsigut neriuutigaarput atuarfiup annertuumiik iluarsarneqarnissaata tungaanut atuarfimmi sulisunut atuartunullu naammaginarsinnaasumik pitsanngorsaasinnaasssalluta, Atuartitaanermut ataatsimiititaliap siulittaasua Kaj Lyberth oqarpoq.