Atuarfiit taarserneqarnissaat nuannaarutigineqarpoq

- Nuummi atuarfiusut qanoq iliuuseqarfiginiaraat nuannersorujussuuvoq, IMAK-imi siulittaasoq Karl Frederik Danielsen oqarpoq.

Illoqarfiit pingaarnersaata pilersaarutaani atuarfiit nutaarluinnaat marluk sanaartorneqartussaapput. Nuup qeqqani ataaseq Siorarsiorfimmilu ataaseq. Nuup qeqqaniittussap piffissap ingerlanerani atuarfiit USK ASK-ilu taarsissavai.

AAMMA ATUARUK Illoqarfiit pingaarnersaat pillugu tamarmiusumit taperserneqarpoq

- Kommunip atuarfiutai marluusut illoqarfiup qeqqaniittut aserfallassimaqalutillu atorneqarsinnaaneri sivisujunnaarluinnarput. Atuartuutitsinnut inissanik amigaateqarpugut, pisariaqartitsinerlu annertusigaluttuinnartussaalluni, Helene Broberg Berthelsen Siorarsiorfiup nittartagaatani taama allappoq.

ASK-imi atuarfiup pisortaata tamanna ilisarivaa. Atuarfik nutaanngilisimavoq aserfallassimallunilu, atuartut inii ullutsinni perorsaanermut naleqqukkunnaarsimapput,  Malene Kongpetsak oqarpoq.

- Atuarfinnut aningaasaliisoqarnissaanut soorunami nuannaarutigaarput, ASK-ip pisortaa Malene Kongpetsak oqarpoq.

AAMMA ATUARUK Illoqarfiit pingaarnersaannut pilersaarusiaq ineriartortitsissaaq

Atuarfiit nutaat marluk 1200-inik atuartoqassapput. Saniatigut atuarfik Hans Lyngemi atuartut 400-nik amerlisinnaanngorlugit allilerniarpaat. Ullumi atuarfik 455-inik atuartoqarpoq.

Atuarfinni atuartut amerlavallaarpata, killormut ingersinnaanera IMAK-imi siulittaasoq Karl Frederik Danielsen isumaqarpoq.

- Imaassinnaavoq atuartut amerlavallaarujussualertut atuarfimmi ataatsimi, taavalu atuarfimmi aqutsisut malinnaanngittoorpata, taava anguniakkamut naapertuutinngittumik ingerlalersoqalersinnaanera eqqummaariffigisoqartariarpoq, IMAK-iminngaanniit erseqqissassuarput, Karl Frederik Danielsen oqarpoq.