Atuarfiit perusuersartarfiini juicenit immiussinini nassuerutigigaa
Qaqortumi politiit angut pisuni nalinginnaanngitsuni marloriarluni kinguaassiutitigut kanngutsaatsuliortutut ilaatigut suliami juicep puukuinik, oqarasuaatit toqqorneranik perusuersartarfinnillu ilaqartumi pasivaat.
Angut Nuummi Peqqissaanermik Ilinniarfimmi pikkorissartoq politiinut sisamanngorneq februaarip 24-ni unnerluutigineqarpoq.
Immiussinerit toqqorsimasut
Ilinniarfimmi ilinniartup arnap oqarasuaat angallattagaq juicep Sun Lollyp puukuaniittoq arnat perusuersartarfianni eqqaavimmi toqqorneqarsimasoq nassaaraa. Oqarasuaammit videoliut minutsini 19-ini immiussereersimasoq paasineqarpoq.
AAMMA ATUARUK Mobili juicep puuanut toqqorlugu arnat perusuersartarfianni immiussitinneqartoq
Angut aatsaat siullermeerluni taama immiusserpasinngilaq. Qaqortumimi Tasersuup Atuarfiata perusuersartarfianut juicep puukuanik siorna novembarip qaammataani aamma toqqorsisimanini angutip nassuerutigaa.
Angerlarsimaffiani suliffianilu misissueqqissaarnerit
Angummut unnerluutiginninneq tamaannga killeqanngilaq. Nunatsinni politiit nunap immikkoortuani pisortaata, Laila Fleischerip KNR-imut tamanna oqaluttuaraa.
- Sumiiffiit marluk misissueqqissaarfigaagut. Tassa angutip suliffia angerlarsimaffialu taakkunanilu elektronikkimut atortorissaarut arsaarinnissutigaagut. Teknikkikkut pigisat tigussaasut misissorneqarisa inerneqarnissaat utaqqivagut, taamaammat pinerluttoqarsimaneranut suli misissuisoqarpoq, Laila Fleischer oqarpoq.
