Mobili juicep puuanut toqqorlugu arnat perusuersartarfianni immiussitinneqartoq
Peqqissaanermik Ilinniarfimmi arnat perusuersartarfianni mobilimik nassaartoqarnerata kingorna angut pikkorissartoq politiinut nalunaarutigineqarsimavoq. Ilinniarfiup KNR-imut tamanna uppernarsarpaa.
Mobili juicep Sun Lollyp puuata iluanut toqqorlugu arnat perusuersartarfianni eqqaavimmut inissinneqarsimasoq ilinniarfimmi ilinniartut ilaata sapaatit-akunnerata siuliani nassaarivaa.
Ilinniartup mobili nassaarimmagu videoliortinneqarpoq. Peqqissaanermik Ilinniarfimmi pisortaq, Lisa Ezekiassen, taama oqaluttuarpoq.
- Ilinniartup mobili nassaarigamiuk takusinnaavaa minutsini 19-ini immiussereersimasoq, pisortaq oqarpoq.
Pisortaq naapertorlugu angutip ilinniartunut allanut nassuerutigaa mobili nassaarineqartoq nammineq pigalugu.
Nassuiaavoq nammineq immiussisimanani, mobilinilu ippassaammalli tammaasimallugu. Lisa Ezekiassenip erseqqissaatigaa angut pineqartoq nammineq oqaloqatigisimanagu.
Pikkorissartitsineq angutip peqataaffigisaa Peqqissutsimut naalakkersuisoqarfiup aaqqissugaraa. Naalakkersuisoqarfimmit ilisimatitsissutigineqarpoq Peqqissaanermik Ilinniarfik suleqatigalugu angut politiinut nalunaarutigisimallugu.
Politiit KNR-ip attaveqarfigai, taakkuli suliaq oqaaseqarfigerusunngilaat.
