Ole Brandt Atuakkiortorsuaq 100-liisussaagaluartoq
- Ole Brandt tassaavoq atuakkiortorsuatta ilaat, nunani allanisut inuiattut naleqartitatsinnik katersugaateqartartuugutta katersaatitta ilaanniinngitsoortussaanngikkaluartoq, Ilinniarnertuunngorniarfimmi kalaallisut atuartitsinermi siunnersorti, Eva Møller Thomassen oqarpoq.
Ole Brandtip 1971-imi atuakkiaasa ilaat ”Qooqa” 1700-kkut aallartinnerani piniartut inooriaasiannik oqaluttuarinnippoq. "Qooqa" kinguaariinnit oqaluttuat sisamaasut siulleraat. Atuakkat kalaallip qanoq ittumilluunniit suliallip ilungersornissaanik ilumoortuunissannillu oqariartuutigaat.
Nalitsinnilu suli akisuasutut ippoq:
- Kulturikkut eriagisassatsinnik tunivaatigut atuakkiamigut eqqaasippaatigut inuiaat sapinngitsorsuarnik siuaasaqaratta aamma uagut sapinngitsorsuusugut, Eva Møller Thomassen oqarpoq.
Ole Brandt oktoberip 22-ani 1918-imi inuuvoq, 1981-imilu toqukkut qimagulluni. Arfineq marlunnik qitornaqarpoq.
Sunngiffimmini pinialulluni angalaarnerit, nipilersorneq, iganeq sanalunnerlu aallutarai. Grønlands Landsrådimi ilaasortaasimavoq atuakkiortullu peqatigiiffiani aallartitsisuullunilu siulittaasooqqaarsimasoq.Kalaallisut allallaqqissorsuaq
Kalaallisullumi atuartitsinerup 1960-ikkut qiteqqunneranni suusupalugisaalluni inissisimagaluartup Olep suleqataaneratigut realskolekkunni kalaallisut atuartitsineq faginngorpoq, ineriartortuaramilu ullutsinni ilisimatusarfiit angullugit kalaallisut sammineqarsinnaasoq, kalaallisut atuartitsinermi siunnersorti oqarpoq.
Tamannalumi atuakkiortumit taalliortumillu taperserneqarpoq.
- Uagut imaaliarsaartugut ilinniartitsisutut puigorsinnaanngisarput: Kalaallisut allallaqqissorsuaq, Aqqaluk Lynge oqarpoq.
Ole Brandtip atuakkiortarnermigut kalaallip aamma kinaassusia ersersinniartarsimagaa, taassuma oqaatigaa.
- Aallakaatitassiatigut KNR-ikkoortartuni Ole Brandtip aallakaatitassiai tassaammata taakkua kinaassutitsinnik ilisarinninnermik ilaatigut atorneqarsinnaasartut.
