Attaveqaqatigiit Danmarkimi efterskolertunik tapersersuinerat iluatsilluartoq
Efterskolertut 76-it attaveqaqatigiinnut maannakkorpiaq peqataapput. 25-t utaqqisutut allatsissimapput saaffiginnittullu 56-it itigartinneqartariaqarsimallutik, Peqatigiiffik Kalaallit Meerartaat KNR-imut taama ilisimatitsivoq.
Peqatigiiffik Kalaallit Meerartaanni kajumissutsiminnik suleqataasut, kalaallit efterskolertut sapaatit-akunnerisa naanerini naapisimaartinnerinik aaqqissuussisarput.
Attaveqaqatigiit inuusuttuaqqat amerlanerusunik attaveqaqateqarnissaannik, kalaallisut oqaatsiminnik atuinissaannik Danmarkimilu efterskolernerminni ulapaarfiusumi "anersaartorfissaqartinnissaannik" siunertaqarput.
- Kajumissutsiminnik suleqataasut maannakkorpiaq 16-it missaanniipput, atuartulli soqutiginninnerujussuat peqataasullu amerlasuupilussuuneri pissutigalugit amerlanerusunik pisariaqartitsigaluarput, Kathrine Saxild Peqatigiiffik Kalaallit Meerartaanneersoq taama oqarpoq.
Iluatsilluartoq
Nunamut allamut nuunneq, oqaatsinik allanik atuilerneq danskillu kulturiannut allaanerusumut naleqqussarniarneq atuartut ilaannut oqitsuinnaaneq-ajorpoq.
Allumut peqataasut arlaannaalluunniit maannamut atuarunnaaginnarlutik Nunatsinnut utersimanngillat, Peqatigiiffik Kalaallit Meerartaanniilli oqaatigineqarpoq atuartut ilaat angerlaannarniarlutik eqqarsaateqarsimasut:
- Taamatullu pisoqarnerani kajumissutsiminnik suleqataasunit oqaloqatigineqarput, kingornalu maaniiginnarniarlutik aalajangerput oktobarillu 28-ianit 30-anut naapeqatigiinnissamut qilanaarnerarlutik. Aamma aappariit angerlaannalersut tusarparput, taakkulu Allumut peqataanissamik neqeroorfigineqarnermik kingorna maaniiginnarniarlutik aalajangersimapput, Kathrine Saxild oqarpoq nangillunilu:
- Ataatsimut isigalugu oqartoqarsinnaavoq Allu iluatsilluartoq; soqutigineqarnera pisariaqartinneqarneralu annertupput - ilimagisatsinnit annertunerungaatsiarlutik. Itigartitsisariaqarsimanerput ajuusaarutigaarput. Kikkulluunniit peqataasinnaasariaqaraluarput, taamaammat neqeroorutigisarput ineriartorteqqissavarput itigartitsinnginnissarput angujumallugu, Kathrine Saxild Peqatigiiffik Kalaallit Meerartaanneersoq taama oqarpoq.
Inuusuttuaqqat nunatsinneersut Danmarkimi efterskolertut 20 procentiisa missaat atuarnertik maannaannaq unitsillugu angerlaannartarput. Taamaammat Peqatigiiffiup Kalaallit Meerartaat atuarunnaaginnartartut ikilisinniarlugit kalaallinut efterskolertunut attaveqaqatigiinnut "Allu"-mik taagorneqartunut inuusuttuaqqat peqataanissaannik neqeroorfigisarpai. Suliniut 2015-imiilli ingerlanneqarpoq.
Allu pillugu uani paasisaqarnerusinnaavutit.
