Nunatsinni inuussutissarsiornermut 220 millionit koruunit
Inuussutissarsiornermut nukissiuuteqarnermullu Naalakkersuisup Aqqalu Jeremiassenip danskillu inuussutissarsiornermut ministeriata Rasmus Jarlovip (K) nunatsinni inuussutissarsiornikkut siuarsaanissaq pillugu isumaqatigiissut Københavnimut tallimanngornermi atsiorpaat.
Isumaqatigiissut Greenland Venturep Vækstfondillu assigiimmik avitassaannik nunatta Danmarkillu 200 millionit koruuninik aningaasaliissuteqarnissaannik imaqarpoq.
AAMMA ATUARUK Danmarkip mittarfiliassanut aningaasaleeqataanissaa inaarutaasumik atsioqatigiissutigineqartoq
Isumaqatigiissut naapertorlugu nunarput aningaasaqarnikkut imminut napatissinnaaneruleqqullugu, ineriartornissaq nutaanillu aningaasanik isaatitsilernissaq pisariaqarpoq, taamaammat aningaasat nunatta inuussutissarsiornikkut pilersaarutaanut iluaqutaanissaat siunertaavoq.
Taamaammat Aqqalu Jerimiassenip isumaqatigiissut nuannaarutigaa, isumaqatigiissummi aningaasaqarnermi ineriartortitseqataasinnaasorai.
- Matunik siunissami ammaasussaagami pingaaruteqartorujussuuvoq, suliffeqarfiillu nunatsinnut aningaasaleerusunnerannut atuerusunneranullu, Inuussutissarsiornermut nukissiuuteqarnermullu Naalakkersuisoq, Aqqalu Jeremiassen oqarpoq.
Tamatuma saniatigut inuussutissarsiornermut puljemik 20 millionit koruuninik aningaasartaqartumik pilersitsisoqarpoq, Greenland Venture aamma Vækstfonden tassannga tamarmik 10 millionit koruunissaqarput taakkulu Nunatsinni inuussutissarsiornermi pilersaarutinut isumalluarnaateqartunut atorneqassallutik.
Nunatsinni suliniutit arlallit aallartissinnaanngornissaat Aqqalu Jerimiassenip aamma neriuutigaa:
- Aningaasaliissutit annertuumik iluaqutaanissaat ilisimanaateqarsinnaavoq, assersuutigalugu ujarassiorfiit ujarassiornerup aatsitassarsiornerullu tungaasigut aningaasaliiniartunut periarfissiinerussasoq - aningaasaliissutillu Vækstfondenimut Greenland Venturemullu tunniunneqarput, taakkua tamarmik immikkut 100 milliuunit koruuninik pissarsipput - taamaattumik siunissami matunik ammaanerussapput, Aqqalu Jeremiassen oqarpoq.
AAMMA ATUARUK Kim Kielsen naammagisimaarinnittoq: Nunatsinni nuannaarutigisariaqarparput
Aningaasaliinerit katillugit 220 millionit koruuniusunit 22 millionit koruunit Namminersorlutik Oqartussaneerput aningaasallu sinneri 198 millionit koruuniusut danskit naalagaaffianneersuullutik.
Danmarkip Nunattalu ataatsimoorlutik Nunatsinni inuussutissarsiornermik pitsanngorsaanissaannut isumaqatigiissut mittarfiit pillugit isumaqatigiissutip ilagaa, danskillu naalagaaffiat Nuummi Ilulissanilu mittarfiit tallilerneqarnissaannut aningaasaleeqataasuuvoq.
Isumaqatigiissut sapaatip akunnerata siuliani pisortatigoortumik inissinneqarpoq.
