Atoqatigiinneq, asanninneq assigiinngissuserlu eqqartorusuppaat
![](/sites/default/files/styles/image_934x467/public/article_images/teens_kalaallit_630.jpg?itok=P2Bp0CbY)
Niviarsissat Sisimiormiut Paninnguaq Fleischer-Lyberth, Kirstine Kreutzmann aamma Paarnaq Larsen inuusuttunut atuagassiassamik aallarnisaasuupput.
Taakku atuartarsimavaat "Vi unge", "Bacar" aamma "Mix". Maqaasivaalli atuagassiaq kalaallit inuusuttortaannut toqqaannartumik saaffiginnittoq.
- Pisariaqartinneqarluinnarpoq inuusuttut atugaat aallaavigalugit atuagassiamik tigussaasumik peqarnissaq. Taamaattumik atuagassiap pingaarnertut sammisai inuusuttuupput, "Teens kalaallit" aallarnisaasui nalunaarput.
Suut imaritinniarnerlugit aamma eqqartoreersimavaat. Tamakku ilagaat atoqatigiinneq, asanninneq aamma assigiinngissuseq.
- Assigiinngissuseq pineqartillugu eqqarsaatigaarput inuiattut assigiissuseq aammali puigornagu assigiinngissuseq, niviarsissa taakku pingasut KNR-imut oqarput.
Maanna kajumissaarutigaat tusagassiutit allat suleqatiginnissaat. Ilaatigut eqqarsaatigineqarpoq atuagassiap imarisaasa ilaat radiokkut inuusuttunit oqallisigineqartarsinnaasut.
Pilersaarutaavoq atuagassiaq qaammamut ataasiarluni saqqummersartussaq ukiamut saqqummertalissasoq. Qaqugorpiarli aammalu qanoq ateqavinnissaa suli aalajangerneqanngillat.