Atomip nukingata ilisimatusarfigineqarnissaa akuerigaat
Partiilli isumani maanna allanngortippaa, Danmarkimi naalakkersuisut toqqammavigisaanni tamanna atuarneqarsinnaavoq, nittartagaq Avisen.dk taama allaaserisaqarpoq.
Danskit ilisimatuui atomip nukinganik suliaqarnissaat 1985-imiilli inerteqqutigineqaraluarpoq.
Thoriumilli nukissiuutitut atorneqartarnerata ilisimatusarfigineqarsinnaanissaa danskit naalakkersuisuisa toqqammavigisaanni ammaanneqarpoq, thorium tassaavoq atomimik nukissiornikkut ineriartorteqqitaq.
Thoriumip ilisimatusarfigineqarnerata akuerineqarnissaaanik Liberal Alliance maajip qaammataani siunnersuuteqarmat, tamanna Venstremit taperserneqanngikkaluarpoq, siunnersuut Venstremit Folketingimilu partiinit amerlanernit itigartitsissutigineqarluni.
Ilisimatusarnissamut aporfiit peerniaraat
Venstrelli isummaminik allanngortitsinera Liberal Alliancep pilersuineq pillugu oqaaseqartartua Villum Christensenip nuannaarutigaa, thorimiumimmi nukissiuutitut ilisimatusarfiginissaanut aporfiit maanna peerneqartussanngormata.
Venstrelli Liberal Alliancep siunnersuutigisaa itigartitsissutigisimagaluarlugu isummaminik allanngortitsinngilaq, Venstrep nukissiuuteqarnermut oqaaseqartartua Thomas Danielsen taama oqarpoq.
- Ilisimatusarfigineqaannarnissaa ajornartorsiutitaqartinngilarput. Ilumulli ilisimatusarfigineqarsinnaanersoq nalornissutigineqarsimammat taamaaliortoqarsinnaanera matumani erseqqissaannarparput, Avisen.dk-mut taama oqarpoq.
