Atlantikup Avannaaneersut igasutsialanngorniunneranni ajugaasoq sapaatit akunnerata naanerani toqqarneqassasoq
Young Arctic Chefimik taasamik Islandimi illoqarfiit pingaarnersaanni Reykjavikimi igasutsialanngorniunnermi ajugaasoq aqagu toqqarneqassaaq.
Nunatsinneersoq Lars Abelsen igasutsialanngorniuttunut ilaavoq.
Taanna igasullu allat Norgemeersoq, Savalimmiuneersoq Islandimeersorlu Young Arctic Chefimik taasamik igasutsialanngorniunnissamut nunagisaminni anngunniutereerlutik Reykjavikimi igasutsialanngorniullutik unammileruttorput.
Igaassat akussallu atugaarpianngitsut
Igasutsialanngorniuteqataasut sisamaasut taakkua igaassat akussallu Issittumeersut amerlaqisut nungukkiartuutaanngitsuusullu atorlugit igassapput.
Aalisakkanik tarajortikkanik qeqqussanik Savalimmiuneersunik marmarsaasikkanik siuleqqiutiliussapput. Savap uummataanik qungasianillu paarnanik Norgemeersunik immiaaqqamillu nunatsinneersumik akusat pingaarnertut sassaalliutigissavaat, naggasiutigalugulu kuanniusanik skyrimillu Islandimeersunik kinguleqqiusiussallutik.
Tassa igaassat akussat Issittumeersut pissarsiareriaannaasut atugaarpianngitsulli Young Arctic Chefimi igasutsialanngorniuttut igaavanni qitiussasut, Nunat Avannarliit suleqatigiiffiat Nordisk Atlantsamarbejde tusagassiorfinnut nalunaarumminni allapput.