Atitunerusumik tunuliaqutaqalerpugut
Siumut siunerissami tapersersorneqarnerpaasaraluarpoq, qinersinermili kingullermi partiip illoqarfinni aamma tapersersorteqarluarnera paasinarsivoq, ilaasortaatitat 14-inngorput partiilu naalakkersuinikkut siuttunngortussanngorluni. Tamannalu Siumumi qilanaarineqarpoq.
-Tunuliaqutarput annertuseriarujussuarpoq, tamannalu inuiaqatigiinni naligiinnerulersitsinissamik sulinitsinnut aqutsisuni suli ilungersornerulluta sulinissatsinnut nukissamik tunineqarpugut. Uagummi tamanna pingaartitariuaannarnikuuarput sulilu pingaartitaralugu, piffissamilu naligiikkunnaariartuinnarfimmi aalajangiusaqarnerput qinersisartunit akilerneqaatigaarput. Allatut oqaatigalugu pingaarutilinnik aalajangiisoqassatillugu innutaasut isumasioqqaartassavagut, Vittus Qujaukitsoq, Inatsisartunut marsip 12-iani 2013-imi qinigaasoq oqarpoq.
Naalakkersuisuutitaqarsimasut taamaasilluni tusangiasaarpai, taakkumi inuiaqatigiit qulaatiinnarlugit inatsisiliortutut Siumup pisuutittarsimavai. Tamanna unitsinneqassaaq, Qujaukitsoq oqarpoq, qinigaaffimmilu aallartittumi innuttaasut tamaasa atugaannik pitsanngorsaasoqarnissaanik neriorsuuteqarluni.
-Piffissami aggersumi suliassarpassuaqarpoq. Pingaarnerit ilagaat ineqarneq, suliffissaaleqinerujussuaq, inuussutissarsiornikkut pissutsit soorunalumi aamma aalisarneq, pitsaanerpaamik atugassaqartitsiffiusussatut suliniuteqarfigisassarput. Naalakkersuisooqatigiinni nutaani qanittumik sulieqatigiilluta ineriartorneq innuttaasunit ujartorneqartoq pilersinniartussaassavarput, Vittus Qujaukitsoq knr.gl-imut nassuiaavoq.
