Atassutip siunnersuutaa KNR-ikkut ussassaarisitsisinnaavoq
TV-kkut radiukkullu peqatigiiffiit KNR-ip kanaliata aappaani, KNR 2-mi piffissamik attartornermi ussassaarisinnaassasut, Steen Lynge isumaqarpoq.
- KNR-ip aallakaatitsisarfiinik marlunnik peqarpugut, namminersortullu kanal 2-mi attartuisinnaanissaat aqqutissiorfigineqarnissaa Atassummiit anguniarparput, Atassummeersoq Steen Lynge taama oqarpoq.
Suliffeqarfiit nittartakkat aviisillu kisiisa aqqutigalugit ussassaarutitik nalunaarutitillu nuna tamakkerlugu siammarsarsinnaassannginnerat ernummatigalugu ulluni kingullerni KNR-imut oqarput.
Aamma atuaruk TELE-POST: pilerisaaruteqartarfigut pitsaanerpaat annaassavagut
Aamma atuaruk RAL Naalakkersuisut siunnersuutaat pillugu: Unammillernartoqassaaq
Ernumassutaallu pinngitsoortinniarlugu tv-kkut radiukkullu peqatigiiffiit namminersortut KNR-2-kkut aallakaatitsinissamut piffissamik attartorsinnaassasut, piffissaliussallu ilaani ussassaarisinnaassasut, Steen Lyngep siunnersuutigaa.
Suliffeqarfiit taamaasillutik innuttaasut sinerissamiittut apuussiffigisinnaassavaat.
Unammillertit pitsaanerulersitsissapput
KNR-imullu aamma iluaqutitaasinnaasoq Steen Lynge isumaqarpoq.
- Attartortitsinikkut KNR-ip aningaasat annaasaasa ilaat immaqa uteqqissinnaapput, Steen Lynge oqarpoq, ilanngullugulu oqarluni KNR 2-mi tusagassiuutit allat aallakaatitsisinnaalernissaat pillugu Atassutip siunnersuutaa akuerineqassappat, KNR pitsaassutsikkut toqqaannarnerusumik unammillerneqarsinnaassasoq.
- Taamaasilluta unammilleqatigiinneq pilersikkutsigu sanaartukkat aallakaatitassiallu pitsaanerusut pilersissinnaalissavavut, Steen Lynge oqarpoq.
Ussassaarutit aviisit piukkunnartinnerulissavaat
Atassutip siunnersuutaa Naalakkersuisunit akuerineqanngippat KNR-ilu ussassaarisinnaajunnaassappat Atassutip ussassaarisinnaajunnaartitsinermik siunnersuutini tunuartikkusunngilaa. Suliffeqarfiit nittartagaq aviisillu aqqutigalugit ussassaarutitik nalunaarutitillu innuttaasunut suli apuussinnaassagaat, Steen Lynge isumaqarpoq.
Aviisillu ussassaarutinik imaqarnerulerpata atuarnissaat piukkunnarnerulissasut ilimagalugu Steen Lyngep aamma oqaatigaa.
Aamma atuaruk Andreas Uldum: Biilimut ussassaarutip peerneratigut tamat oqartussaaqataanerat innarlerneqarnavianngilaq