Atassut ilaasortani pigiinnarumallugit inatsisiliornermik allanngortitserusuttoq

Partiimit Atassummit inatsisartunik ilaasortanik partiinut allanut pilersuisuuneq naammaleqaaq, Inatsisartunut qinersinissamut Atassut sinnerlugu sassartoq Sivert K. Heilmann taama isumaqarpoq. Taamaattumik Atassut sinnerlugu qineqqusaartussat partiimiiginnarnissaat anguniarlugu atsiortinneqartalissapput.

Inatsisartut Naalakkersuisullu pillugit Inatsisartut inatsisaat atuuttut malillugit Inatsisartunut ilaasortanngortut namminneq nalunngeqatiginnissusertik kisiat tunngavigissavaat, tassa isumaqarluni partiimit partiimut allamut nuukkaluaraanni partiimi immikkut maleruagassaqaraluaraanniluunniit kinguneqartitsisoqarsinnaanngitsoq.

Tamannali allanngortinneqartariaqartoq, Atassut isumaqarpoq.

- Taannalu qinersisarnermi inatsit aamma allanngortittariaqarnera suliassat siullerpaat ilagisariaqarpaat. Nutaamik nalilersorneqartariaqarpoq aamma pisoqaavallaartutut isumaqarfigigakku, Siverth K. Heilmann KNR-imut oqarpoq.

AAMMA ATUARUK Atassutip qinigassanngortitai partiimiiginnarnissaminnik neriorsuuteqassasut

Qinersinermi siuliani Atassutip Inatsisartunut ilaasortaatitai marluk, Knud Kristiansen aamma Mala Høy Kúko partiimut ilaasortaajunnaarmata Atassutip inatsisartuni ilaasortaatitani annaavai.

Taamaattumik Atassut sinnerlugu qineqqusaartussat partiimiiginnarnissaat anguniarlugu nutaamik periuseqartoqartussanngorpoq, ilaasortat partiimut Atassummut pituttuisumik atsiortinneqartalerlutik.

- Massakkut piumasarisimavara siulersuisunullu akueritillugu inatsisartuni isertitaqassagutta, taava qinigaaffik naallugu Atassut tunuliaqutaralugu inatsisartunut sulisoqassasoq, Siverth K. Heilmann oqarpoq.  

Atassut sinnerlugu inatsisartunut qineqqusaartut aqqaneq marluupput.