Atassut: Naalaaffeqatigiinnermut apeqqut akunnaffiuvoq
Naalakkersuisooqatigiilernissamut isumaqatigiinniarnerit ingerlaqqipput.
IA-p siulittaasuata, Múte Bourup Egedep Atassutip siulittaasua Aqqalu C. Jerimiassen ullumi ataatsimeeqatigaa.
Namminiilivinnissarli akerlialu Danmarkip naalagaaffeqatiginera pillugit apeqqut Atassutip siulittaasuani initungaatsiarpoq.
Naalakkersuisoqatigiinnik katiterineq
Inatsisartuni atuuffiit 31-upput.
Partii naalakkersuisoqatigiilluunniit amerlanerussuteqassagunik 16-inik atuuffeqassapput.
Inuit Ataqatigiit 12-inik qinigaatitaqarput.
Siumut qulit.
Demokraatit pingasut.
Naleraq sisamat.
Atassut marlunnik qinigaatitaqarpoq.
Nunatta Qitornai Suleqatigiissitsisullu Inatsisartunut qinigaatitaqanngillat.
Atassutip nunatta naalagaaffeqatigiinni ilaanissaa kissaatigaa, qinersinermilu ajugaasup IA-p minnerusullu Naleqqap piffissap ingerlanerani namminiilivittoqarnissaa kissaatigaat.
AAMMA ATUARUK Naleraq naalakkersuisoqatigiinnissamut isumaqatigiinniarnerit pillugit: Qanilliartorpugut
Taamaakkaluartorli Aqqalu C. Jerimiassen isumalluarpoq.
- Apeqqutaavoq aamma nammineq uagut qanoq periarusutsiginersugut, Aqqalu C. Jerimiassen oqarpoq nangillunilu:
- Malugisinnaavara qanittuararsuusoq suleqatigiiffeqarsinnaaneq, kisianni aamma oqaloqatigiinnerit nangeqqissuagut qanorlu ingerlaqqissanerluta. Manna tikillugu nuannertumik pissuserissaartumik naapeqatigiilluartakkagut assigiinngittut eqqartornerugatsigit, taavalu uku suut aporfeqalissanermut qanoq ilisoqarsinnaanerit allaat eqqartorlugit.
Naalagaaffeqatigiinnermut sammisami aalajangersimaniartoq
Inuit Ataqatigiit qinersisoqarnerani Inatsisartunut inissanit aqqaneq-marlunnik qinigaatitaqarput, taamaammallu Naalakkersuisuni siulittaasuuffimmi inissinnissamut suleqatigissarsiussalluni.
Atassut marlunnik qinigaatitaqarluni Inatsisartuni partiini minnerpaasoq, Nalerarlu sisamanik qinigaatitaqartoq IA-mik ukiuni tulliuttuni suleqateqarnissamik isumaqatigiissuteqarniarnermi kiserngorupput.
AAMMA ATUARUK IA: Naalakkersuisoqatigiinnissamut isumaqatigiissuteqariartorpugut
Aqqalu C. Jerimiassenilli isumalluarnera partiiata partiinit isumaqatigiinniartunit allanit allaanerusumik isummerfeqarneranik akunnaffeqarpoq, Atassummi naalagaaffeqatigiinniiginnarusuppoq, IA-lu Nalerarlu qaquguunersoq namminersulerusupput.
- Tassami naluneqanngittutut Atassut naalagaaffeqatigiinnermut illersuisutut partiiuvoq. Taavalu uku partiit marluk naalagaaffinngornissamut erseqqissumik oqariartuuteqartarlutik, tassaniikannerpoq erseqqissumik allaanerussuterput.
Atassullu tamatumuuna aalajangersimaniartoq Atassutip siulittaasuata oqaatigaa.
- Iisarnikuusarput siornatigut annertuallaareerami naalakkersuisoqataasarnitsinni taamani allaat tunngaviusumik inatsisissamik suleqataalluta pisarnikuulluta, tamaammat taannaqqeqqinnaaq qulequtaq, attanniarlugu aaliangiussimavarput, Atassutip siulittaasua, Aqqalu C. Jerimiassen oqarpoq.
Demokraatit IA-mik isumaqatigiinniarnermit assigiinngissuteqarpallaarneq patsisigalugu tallimanngormat anipput, isumaqatigiinniartullu ittuata, Múte Bourup Egedep, Siumut naalakkersuisoqatigiinni patajaattuunissaat upperiunnaarlugu ippassaq marlunngornermi isumaqatiginiarunnaarlugu.