Atassut: Innarluutillit aamma sulisinnaapput
Pisortat namminersortullu suliffeqarfiutaanni innarluutillit sulisorineqartarnerat qaqutigoorpoq. Tamanna Atassut sinnerlugu Inatsisartuni ilaasortat allanngortikkusuppaat. Siverth K. Heilmann aamma Knud Kristiansen siunnersuuteqarput pisortani namminersortunilu innarluutillit sulisinnaanerat pisariinnerulissasoq.
Taakku isumaqarput tamanna pillugu inatsit qasungavallaartoq.
- Isumaqarpugut nunatsinni innarluutilittatsinnut naatsorsuutiginninnerput annertusartariaqaripput, aamma taakku sulisinnaasortai sulisussatut naatsorsuutigalugit, Siverth K. Heilmann aamma Knud Kristiansen Inatsisartut ukiaanerani katersornissaannut siunnersuummut tunngavilersuumminni allapput.
Taakku siunnersuutigaat Naalakkersuisut peqquneqassasut innarluutillit pisortat namminersortullu suliffeqarfiini sulilersinnaanissaat oqilisaagivissagaat.
