Atassut: Inatsisit nunatsinnut tulluarsarneqartariaqarput
- Nunatsinni inatsisiliornerput inuiaqatigiinnut tulluarsartariaqarpoq. Nunatsinni partiit siullersaasa ilaanni Atassummi siulittaasoq, Knud Kristiansen, taama nalunaaruteqarpoq.
Knud Kristiansen, Atassutip siulittaasua.
Allattoq Sara K. Jakobsen
oktobarip 03-at 2014 18:00
- Maanna inatsisiliornerit amerlanerpaat kingornutaraagut systemit allaqqinnaaninngaanniit, inuiaat allaninngaanneersut, Atassutip siulittaasua Knud Kristiansen oqarpoq.
- Eqqumiigineqarsinnaagaluarpoq qanoq ililluni inatsiseq inuppalaarsinnaagami, kisiannili isumaqavippunga inatsiliornermi taanna pingaarutilittut ilaasinnaasoq, Knud Kristiansen oqarpoq.
Inatsisilli sorpiaat systemimit allamit kingornussimasarinerigut oqaatigiumanngilaa.
- Uani assersuuteqarusunngilanga, isumaqannginnama inatsiseq ataaseq aalajangersimasoq nittarsaatissallugu. Kisianni inatsisiliornermi inatsisit ilusilersornerani Inatsisartuni pingaarutilittut ilaatikkusukkigut, inuppalaartumik ilusilersorneqartalerniassammata, Knud Kristiansen oqarpoq.
