Atassut ikinnerpaanik ilaasortaaffeqalerpoq

- Uagut Inatsisartuni ilaasortanngortugut marluusugut isumaqarpugut tallimanik ilaasortaaffeqalernerput naammalluartoq, Gerhardt Petersen oqarpoq.

Atassut Inatsisartuni Ataatsimiisitaliami ataatsimi siulittaasuutitaqalerpoq. Atassutillu Inatsisartunut qinigassanngortitaasa ilaannit, Knud Fleischerimit, KNR ilisimatinneqarpoq Atassut Aningaasaqarnermut Ataatsimiisitaliami siulittaasuutitaleqalernissaa isumaqatigiissutigineqarsimagaluartoq

- Tassani ilaatigut piumasarisaavoq siulittaasup Nuummi najugaqartuunissaa. Uangalu Nuummi maannakkuungallartoq najugaqarnissara kajumerinngilara Qaqortumi najugaqarusunnerungama. Taamaattumik aamma tamakkua nipilersoqataasimapput, Gerhardt Petersen oqarpoq.

Avataaniit malinnaasutut isumaqarnarsinnaavoq Partii Inuit Atassummiit taasisikinnerungaluarlutik ataatsimiisitaliani inissanik amerlanernik tigusinermikkut pitsaanerusumik inisittut. Taakkuami ilaasortaaffinnik arlalinnik tigusipput, ilaatigut siulittaasuuffiit marluk pissarsiarigamikkit, naak Atassut ataasiinnarmik tigusigaluartoq. Taamaattorli Atassutip ilaasortaaffigilikkatik naammagisimaarpaat:

- Tassa uagut naammagisimavagut taakkua tigusagut, aamma oqarnittuut pimoorullugit suliarissagaanni taava isumaqarpunga uagutsinnut naammattut. Kammagut Partii Inunninngaanneersut ulapissaqaat ataatsimiisitaliani sulinissaminni, Gerhardt Petersen oqarpoq..

Politikkimik malinnaasut ilaannit aamma immaqa ippigineqassaaq sooq Atassutip siulittaasua Naalakkersuisunut imaluunniit Inatsisartuni ataatsimiisitaliat ilaanni siulittaasunngorsimannginnersoq. Taannami siulersuisuunerminit pisinnaatinneqarsimavoq Naalakkersuisunut ilaasortassamik toqqaanissaminut:

- Tassanilu Steen Lynge maani Nuummi najugaqartoq tikkuarsimavara Naalakkersuisuni ilaasortassatut. Tassami uannut tikkuarsimassangaluaruma Nuummi najugaqartussaassangama, taannalu oqarnittuut kajumerisimanngilara Qaqortumi najugaqarama, Gerhardt Petersen oqarpoq.