Atassut ataatsimeersualerpoq
- Ineriartorneq pingaarnertut qulequtsiupparput, ingerlaqqittariaqaratta alloriartariaqalerlutalu, Atassutip siulittaasua Gerhardt Petersen KNR.gl-mut oqarpoq.
Ataatsimeersuarneq Hotel Hans Egedep ataatsimiittarfiani ingerlanneqartussaq, ullunilu marlunni sivisussuseqartussaq ingerlanneqalerpat, partiip ulluinnarni Danmarkimi suleqataa Venstre nalunaaruteqarpoq.
Pilersaarutit malillugit Ventre peqataatitaqartussaagaluarpoq qinersinissarli pissutigalugu peqataatitaqarsinnanatik nalunaarput. Taama nalunaarput Venstrep siulittaasua Lars Løkke Rasmussen qinersinissamik suaaruteqariitsiartoq.
Gerhardt Petersen Atassummi siulittaasuuvoq taassumalu nalunaarnera malillugu siulittaasussarsiornissami allamik maannamut nalunaartoqanngilaq.
- Siulersuisuunerni kajumissaarneqareernerma kingorna tunngavigalugu, siulittaasutut qinigassanngortinniarlunga eqqarsaatigaara. Maannamulli allanik siulittaasutut qinigassanngortittoqarneranik ilisimasaqanngilanga, soorunami allanik qinigassanngortittoqarpat ajorinavianngilluinnarpara, Gerhardt Petersen oqarpoq.
Aaqqissuussaanikkut Atassummi siulittasup tullia Hans Lyberth, partiip iluani allamik suliaqarusulersimavoq, taamaattumillu Atassummi Politikkikkut siulittaasup tulliatut inissisimaffik, ullumikkut Siverth K. Heilmannimit inatsisartuni ilaasortaasumit issiavigineqartoq, tiguniarlugu aalajangersimavoq.
Ove Thomassenip ullumikkut Atassummi ulluinnarni aqutsisuni ilaasortaasup, nalornissutigaa ilaasortatut qinigassanngorteqqissanerluni. Ullumikkut Kalaallit Nunaanni Volleyballtertartut siulittaasuattut inissisimanini pissutigalugu.
Ataatsimeersuarnermi inuit katillutik 25-t missaat peqataassasut Gerhardt Petersenip nalunaarutigaa, taakkunannga pingasut Nuummeeersuullutik. Sinnerilu sinerissamiit avannaani Upernavimiit kujataani Nanortalik angullugu kiisalu tunu ilanngullugu peqataaffigineqartussaalluni.
