Atassut: Akuersaanngilluinnarnerup attatiinnarneqarnera uggornarpoq

Atassutilli akuersaanngilluinnarnerup attatiinnarniarneqarnera uggoraa:

- Uggoraarput, maannami eqqartugarput nutaartaqanngilaq. Annertussutsinut kililiussat EU-mi Canadamilu atuuttut oqaloqatigiissutigerusukkaluaratsigit. Nunatsinni suliffinnik pilersitsissaaq minnerunngitsumillu nunap aningaasaqarneranut iluaqutaassalluni, Atassutip siulittaasua Gerhardt Petersen oqarpoq.

Naalakkersuisooqatigiit akuersaanngilluinnarneq pillugu isumaqatigiissutaat, 2010-mi aasakkut atsiorneqartoq, Demokraatit allanngortikkusunngilaat:

- Tamakkerlugu qulaajaaffigineqanngimmat maannakkorpiaq isummerfiginissaanut piareersimanngilagut, aamma Demokraatit tungaannit oqaatigiuarparput uranimik piiaaneq ajorinatigu, aatsaalli peqqinnissamut avatangiisinullu illersorneqarsinnaasumik tamanna pisinnaappat. Isummerfigisinnaalernissaa suli tikinngilarput, Demokraatit siulittaasuat Jens B. Frederiksen oqarpoq.

Naalakkersuisooqatigiit Inuit Ataqatigiit, Demokraatit Kattusseqatigiit Partiiatalu Qoornumi isumaqatigiissut 2010-mi aasakkut atsiorpaat, tassanilu ilaatigut allassimavoq:

Issuaaneq: "....aatsitassanut qinngornernik ulorianartunik akulinnut tunngatillugu akuersaanngilluinnarnermik politikkeqarnerup allanngortitsinnissaanut piffissaannginnera naalakkersuisooqatigiit isumaqatigiissutigaat, peqqinnissamut avatangiisinullu kingunerisinnaasai pillugit paasissutissanik suli amigaateqartoqarnera pissutigalugu.", issuaaneq naavoq.

Inatsisartut Inuussutissarsiornermut ataatsimiititaliaata Inatsisartut ukiaq ataatsimiinnerisa nalaani Naalakkersuisut peqquai immikkut ilisimasalinnik suligasuartussanik, akuersaanngilluinnarnerup allanngortinneqarnerata kingunerisinnaasaanik nalunaarusiamik Inatsisartut upernaaru ataatsimiinneranni saqqummiussisussanik  pilersitsissasut. Immikkullu ilisimasallit nalunaarusiaat naalakkersuisooqatigiit utaqqivaat.

Kattusseqatigiit Partiiata aatitsassarsiorneq periarfissarpassuaqartutut isigaa, taamaaliornikkut siunissami suliffinnik pilersitsisoqarnissaa qulakkeerneqassammat, avatangiisinulli peqqinnissamullu illersorsinnaasumik ingerlanneqarnissaa apeqqutaatillugu:

- Kattusseqatigiit Partiianit aatsitassanik piiaaneq ammaffigaarput, avatangiisinulli peqqinnissamullu illersorsinnaasumik ingerlanneqarsinnaanissaa apeqqutaatillugu. Taamaaliornikkut kalaallit suliffissaat sapinngisamik amerlanerpaat qulakkeersinnaavugut, Knud Fleischer Kattusseqatigiit Partiianeersoq oqarpoq.

Siumup siulittaasua Aleqa Hammond ima oqarpoq:

- IA-p ataatsimeersuarnerani aalajangiussaq ataqqivarput. Nunattali pisussutai piujuaannartitsinissaq tunngavigalugu ingerlanneqassappata periarfissat nunatta ujaraaniittut isummerfigineqarnissaat avaqqunneqarsinnaanngilaq.

- Piiaanermi uranip qanoq annertutigisinnaaneranut qummut killiliisoqarnissaa pisariaqarluinnarpoq. Aamma mianersornissamik tunngaveqarluni periarfissanik taakkuninnga atorluaanissarput avaqqussinnaanngilarput, IA-llu taamatut aamma isummernissaanut piffissaq apeqqutaaginnarpoq, Siumup siulittaasua oqarpoq.