Atassut aamma Partii Inuit isumalluarput

Aamma Partii Inuit isumalluarput, naak ataatsimeereernerup kingorna taakku annertunerusumik oqaaseqasinnaaneranngikkaluarlutik.

Partiit siulliit Siumumit qaaqquneqartut ualeq manna nalunaaqutaq pingasunut ataatsimeeqatigineqarput, Atassutikkormiut siulliullutik isertinneqarlutik kinguninngualu Partii Inuit kaffisoqatigineqarlutik.

Atassutip siulittaasua, Gerhardt Petersen isumalluarpoq.

- Kaffisoqatigiinnerput ajunngilluartumik paaseqatigiiffiulluarlunilu ingerlavoq qineqqusaarnerullu iluani assigiinngitsut eqqartortarsimasagut eqqartorlutigit. Aamma eqqartukkatsinnut ilaapput suut immikoorutigilaakkavut, kisianni ataatsimut isigalugu ataatsimiinneq siulleq ajunngivissumik ingerlanneqarpoq.

Gerhardt Petersen taama oqarpoq, oqaloqatigiissutaasullu ilaat imaattut oqaatigalugit.

- Aalisarneq pillugu assigiinngitsutigut eqqartugaqarpugut, ilinniartitaanerup iluani aamma nunani allani ilinniagaqartarneq eqqartorlutigit, Gerhardt Petersen taama oqarpoq.

Atassutip Siumullu naapisimaarneri minuttini 25-ini ingerlanneqartoq Partii Inuit sivisunermik ataatsimeeqatigineqarput, tassa minuttine 36-ini taakku ataatsimeeqatigineqarmata.

Naapisimaarneq siulleq qaangiummat, Partii Inuit siulittaasua, Nikku Olsen ima naliliivoq.

- Naapisimaarnitsinni oqaloqatigiissutigaagut, soorlu kalaallit nukittorsarneqarnissaat aningaasarsiornikkullu pingaaruteqarsinnaasut assigiingitsut eqqartorlutigit, tamakkulu tassa oqaloqatigiissutigeqqinneqarsinaalluarput tulliani naapeqqikkutta.

Partii Inuit siulittasuata, Nikku Olsenip oqaatigerusunngilaa, aatsitassarsiornerit pillugit oqaloqatigiinnermi sorpiaat eqqartorneqarsimanersut.

- Tamakku pillugit siammasissumik eqqartivugut, kisianni maanna oqaatigisinnaanngisannik.

Partii Inuit siulittaasua, Nikku Olsen taama oqarpoq.