ATAATSIMUT ISIGALUGU Qaleralittassanik qaffaanerit ima oqaaseqarfigineqarput
Qaleralittassanik qaffaasoqarnissaanik akuersissuteqartoqarnera, uumassusilinnik immikkut ilisimasalinnit piujuaannartitsinissaq tunngavigalugu ingerlatsinermut akornutaasinnaasutut nalilerneqartoq pillugu oqaatigineqartut allaaserineqartullu matumani katersorneqarput.
Karl Kristian Krusep (Siumut) Inatsisartuni siunnersuutaa juunip qaammataata qiteqqunnerani akuersissutigineqarpoq, amerlanerussuteqalaaginnaraluartoq akuersissutigineqarluni.
Naalakkersuisut ilisimaarivaat aqutsiveqarfinni pineqartuni qaleralittassiissutigineqartut biologit inassutaannit amerlanerummata, aalisarnermut naalakkersuisoqarfimmi allaffimmi pisortaq Jóhanna Olsen qaleralittassanik qaffaanissaq akuersissutigineqarmat tusagassiorfinnut nalunaaruteqarluni taama allappoq.
AAMMA ATUARUK Uummannamut Upernavimmullu qaleralittassiissutit qaffaavigineqartut
Aalisarnermut, piniarnermut nunalerinermullu naalakkersuisup Finn Karlsenip (Siumut) qaleralittassanik qaffaanerit isumaqatiginngilai Inatsisartunili aalajangiinerit naalattariaqarnerarlugit.
- Aarleqquteqartoqarpat uanga aamma tupiginngilara, pingaartumik Qeqertarsuup tunua sapinngisannik peqqissaarnerusumik suliarineqarnissaa uanga ingerlakkusukkaluarpara. Paasiniarusukkaluarpara qanoq isiorluta pitsaanerusumik taavani aalisarneq ingerlanneqarsinnaanersoq.
- Aalisartut peqatigalugit aaqqiissuteqarniaraluarpunga, kisianni tassa Inatsisartunit sukkasuumik, tuaviortumik allanngortiteriumasoqarpoq. Taamaammat tamanna uanga aamma naalattariaqarsimavara, Finn Karlsen KNR-imut oqarpoq.
AAMMA ATUARUK Finn Karlsen: Inatsisartut naalattariaqarpakka
Allaat aamma Aalisartut kattuffiata KNAPK-p qaleralittassanik qaffaanerup kingunerisinnaasai aarleqqutigai.
- Imaannaanngitsuuvoq.
- Maannakkut pisassiissutigineqartartut 30 procentii, imaluunniit taanna sinnilaarlugu, qaangersimaneqareerput. Taavalu aamma taakkua qaavatigut suli annertunerusumik qaangiisoqaqqissappat, tamanna aalisarnermik ingerlatsinermik akisussaassuseqanngitsuliornerussaaq, KNAPK-p siulittaasua Henrik Sandgreen KNR-imut oqarpoq.
AAMMA ATUARUK KNAPK: Qaleralittanik amerlisaanissaq akisussaassuseqanngitsuliorneruvoq
Siunnersuuteqartoq Kark Kristian Kruse Niaqornanut pisassiissutigineqartut qaffaavigineqarnissaa immini soqutigisaqarfigaa, taannami KNT-mik piginneqataavoq, isornartorsiuisoqarnerali paasisinnaanngilluinnarnerarpaa.
- Uggorisama annertuut ilagivaat, allaat aalisartut aalisapilunnerannik taaguinerit aallartimmata. Inuiaqatigiit taama ikitsigisut aalisartullu ikitsigisut aalisapilunnermik taaneqarsinnaanngillat, aamma innaarliisinnaaneranik kinguneqarsinnaasutut takorluunngilara, Siumup politikkikkut oqaaseqartartua Karl Kristian Kruse taama nassuiaavoq.
AAMMA ATUARUK Krusep isornartorsiutit eqqunnginnerarpai
Uumassusilinnik iliimatuut misissuinerisa tusaanngitsuusaarneqarsinnaaneri Sustainable Fisheries Greenlandimi, SFG-mi, siulittaasup Henrik Lethip paasisinnaanngilluinnarpaa.
- Taamaaliornikkummi aalisarnermik aqutsinermut tatiginninnimininnguussimasoq nungussaaq. Aqutsinermi allangujaassuseqarnersoq upperiuminaappoq. Tassami aningaasarpassuit atorlugit aalisarnermi atortussanik pissarsiniarniaraanni, taava aqagu ilumut aalisagaqassanersoq, qanoq ililluta nalussanngilarput?
Inuiaqatigiinni nutaaliaasuni aalisarnermi taamatut aqutsisoqarsinnaanngilaq, Henrik Leth KNR-imut taama oqarpoq.
AAMMA ATUARUK Isornartorsiuisut ilaqqipput: Aalisarnermi taamatut aqutsisoqarsinnaanngilaq
Illit qanoq isumaqarpit? Ataani isummersueqataagit:
