Krusep isornartorsiutit eqqunnginnerarpai

Qaleralinniarnermi aqutsiveqarfinni Upernavimmi, Uummannami Qeqertarsuullu Tunuani killeqanngitsumik qaleralinniarsinnaalernissamik siunnersuumminut ulluni kingullerni isornartorsiuisoqarnera,  Siumumi politikkikkut oqaaseqartartup Karl Kristian Kruse, paasiuminaatsippaa.

Siunnersuut, aalisakkanik ilisimatuut inassutaannut assortuisoq, aalisarnermik naalakkersuisumik Finn Karlsenimik, KNAPK-p siulittaasuanik Henrik Sandgreenimik minnerunngitsumillu aalisakkanik ilisimatuunik isumakululersitsivoq  –  Karl Kristian Kruseli isumakuluuteqanngilaq;

- Pinngortitaleriffiup inassutai imaanngilaq taakkoqqissaat kisimik aallaavigineqassasut, Inatsisartunut ilaasortaq Karl Kristian Kruse taama oqarpoq.

Isumakuluutit isornartorsiutillu ingammik maanna aalisapiluttoqarpat kinguaat tulliuttut aalisagartassaarunnissaannut  tunngapput. Pisisartut qaleralinnik nunatsinneersunik pisiumajunnaarnissaat illua tungiliuttut aamma annilaanngatigaat.

- Uggorisama annertuut ilagivaat, allaat aalisartut aalisapilunnerannik taaguinerit aallartimmata. Inuiaqatigiit taama ikitsigisut aalisartullu ikitsigisut aalisapilunnermik taaneqarsinnaanngillat, aamma innaarliisinnaaneranik kinguneqarsinnaasutut takorluunngilara, Inatsisartunut ilaasortaq oqarpoq.

Taanna aperaarput, oqarsinnaanersoq, uanga ernumanngilanga kinguaassatta qaleralittassaarunnissaannut:

- Massakkut oqallittoqarsinnaanngilaq, siunissamik kinguaassatta innarliisussamik allaat nipilimmik eqqartuilereerluni, aalisartut aalisapiluttutut taaneqarlutik, Karl Kristian Kruse, akivoq.