Ataatsimut isigalugit: Kalaallit Folketingimut qinigassanngortittut aaku
Folketingimut novembarip ulluisa aappaani qinersisoqassaaq. Nunatsinnit qinigassanngortittutut nalunaartut maanna tallimaannaapput.
Tassaallutillu:
Naleraq:
Kiista Fencker aamma Juno Berthelsen.
Kiista Fencker, taanna Inuit Ataqatigiit Naleqqallu 2021-mi apriilimit ukioq manna apriilip sisamaanut naalakkersuisoqatigiinneranni peqqissutsimut naalakkersuisuuvoq. Nalerarmi naalakkersuisoqataajunnaarpoq, imaluunniit – siulittaasup, Hans Enoksenip oqarnera naapertorlugu partii Inuit Ataqatigiinniit anisitaavoq.
Kingullermik folketingimut 2019-imi juunimi qinersisoqarmat IA-mit Aaja Chemnitz qinigaavoq.
Taanna 5.686-init taaguunneqarpoq.
Aki-Matilda Høegh-Damilu katillugit 3.467-init taaguunneqarluni.
Naleqqap IA-llu naalakkersuisoqatigiinneranni Juni Berthelsen nunanut allanut naalakkersuisuusumut, Pele Brobergimut allattaavoq. Brobergip namminiilivinnissamut atatillugu kikkut siunissami taasisinnaasariaqarneranik oqaaseqarnerata kingorna siorna taanna atuuffimmit septembarip 27-ani peersitaavoq.
Inuit Ataqatigiit:
Aaja Chemnitz, Folketingimi 2015-imi ilaasortaasoq.
Inuit Ataqatigiit qinigassanngortitanik allanik suli nalunaaruteqanngillat.
Atassut:
Aviaq Kleist aamma Arnánguak Jeremiassen.
Siumut:
Siumut qinigassanngortitaminnik saqqummiillutik nalunaaqutaq ataatsimut tusagassiortunik katersortitsissaaq.
Demokraatit:
Qinigassanngortitanik suli nalunaaruteqanngillat.
Folketingimut qinersinissamut ullut aqqanillit sioqqullugit nunatsinnit qinigassanngortitanik nalunaaruteqarnissamut killissarititaavoq.