Ataatsimoortumik tapiissutit ilaneqarnissaannik siunnersuut akerlerineqartoq
Suleqatigiissitsisut Partiiat naapertorlugu aningaasarpassuit sorpassuarnut pitsanngorsaataasinnaagaluarput.
Michael Rosingilli Tillie Martinussenillu partiitoqaanni isumaqanngillat Kalaallit Nunaata siuarsarnissaanut aningaasat amerlanerusut Danmarkimit piumasarineqarnissaannut.
- Demokraatininngaannit isumaqanngilagut una aqutissaasoq. Demokraatiniit isumaqarpugut, aningaasat pigeriikkavut suli atorluarnerusinnaasut, Demokratit siulittaasuat Randi Vestergaard Evaldsen taama oqarpoq.
AAMMA ATUARUK Rosingip naalagaaffik tapiissuteqarnerutinniaraa
Siunnersuut kukkusumik kalerrisaarinerusoq
Danmarkip ukiumoortumik tapiissutaanik qaffaanissaq aamma Siumumi tapersersorneqanngilaq.
Tassani isumaqarput Slotsholmimut aningaasanik amerlanernik piumalluni nalunaaraanni tamanna kukkusumik kalerrisaarinerusoq:
- Siumuminngaanniit suliarerusutarput tassaavoq, naalagaafinngornissatsinni aamma naalagaaffinnik allanik suleqateqalernissaq. Taamaammat isumaqatiginngitsorujussuuarput, aningaasanik pituttorsimasunik nunanullu assigiingitsunut pituttorluta ingerlaqqinnissarput, politikkikkut oqaaseqartartoq Jess Svane oqarpoq.
AAMMA ATUARUK Aningaasanut inatsit naalagaaffimmit tapeqartariaqarnermut takussutissiivoq
Naalagaaffiup Kalaallit Nunaannut ukiumoortumik tapiissutai koruunit 3,4 milliardiusut Nammisorluni Inatsimmi nikittussaajunnaarsitaapput, taamaammallu taanna allanngortittariaqassaaq Nunatsinnut tapiissutit qaffanneqassappata.
Namminersornermut Inatsisip allanngortinneqarnissaa minnerpaamilluunniit tapersersornagu Inuit Ataqatigiit KNR-imut allakkatigut naqissuserpaat.
- Suliaq naammassillugu suliareriigaq pillugu isumaqatigiinniaqqinniaraanni aamma suliassat allat ilanngunneqartariaqassapput. Tamanna Kalaallit Nunaannut kingumut alloriarnerussasoq, tamatumunngalu Inuit Ataqatigiit peqataarusunngitsut siulittaasoq Sara Olsvig KNR-imut taama allappoq.
Danmarkip tapiissutiminik qaffaanissaa Suleqatigiissitsisut Partiiata siunnersuutaa taamaalilluni Nunatsinni amerlanerussuteqartunit tapersersorneqanngilaq.
AAMMA ATUARUK Tunngaviusumik inatsiseqaraluarluni naalagaaffimmit tapiissutisiaqarsinnaasoq
Folketingimit aalajangerneqassaaq
Taamaattumik Demokratit danskit partiivinut Folketingimi siunnersuutigineqassappat ersarissumik kajumissaaruteqarput.
- Isumaqarpunga, Folketingimi ilaasortat siunnersuut una qimassagaat. Akisussaaffimmik nunatsinni tigusereerpugut, taannalu Nunatsinni naammassisariaqarparput, Demokratit siulittaasuat Randi Vestergaard Evaldsen oqarpoq.
