Finland: Isumalioqatigiissitaq saamit oqaluttuassartaannik qulaajaasinneqassaaq
Finlandimiut nuna tamakkerlugu nutaarsiassaqartitsiviat, Yle taama allaaserisaqarpoq.
Finlandimiut naalakkersuisuisa Ilumoortussaq Saammaateqatigiinnissarlu pillugit Isumalioqatigiissitamut, saamit oqaluttuassartaannik nassuiaasiiniarnermik siunertaqartumut, 1,5 millionit eurot - tassa danskit koruuninngorlugu 11 millionit naalagaaffiup 2019-imut missingersuutaanni immikkoortippaat.
Matumani pingitsaaliinikkut nuutsitsilluni meeqqat inuusuttullu perorsaavimmut ineqarfiusumut nuutsinneqartarnerminni misigisartagaat pisimasullu saaminut amerlanerpaanut kingunerlutsitsisut nassuiaasernerat ilaatinneqarpoq.
- Ilumoortup nassuiaasernissaa siullertut pisariaqartipparput. Soorunami ilumoortup suunera oqaatigissallugu nalunartuaannarpoq. Kisianni tassa inuit ataasiakkaat nammineq misigisimasaat taakkunani ilumoortuusoq aallarniutigissavarput.
Finlandimiut inatsiseqarnermut ministereqarfiata ataani Oqartussaaqataanermut, Oqaatsinut Tunngaviusumillu pisinnaatitaaffinnut immikkoortortami pisortaq, Johanna Suurpää, Ylemut oqarpoq.
Ilumoortussaq Saammaateqatigiinnissarlu pillugit Isumalioqatigiissitap ilaasortassai aatsaat toqqarneqalerput.
Norge, Sverige Finlandilu akimorlugit saamit inatsisartuisa Sametingip isumalioqatigiissitaqalernissaa isumassarsiaraat.
