Ataasinngornermi ulloq naallugu anoraasuarujussuartassasoq

Kitaani sumiiffinni arlalinni ataasinngornermi anorlingaatsiartassaaq. Nuummi bussit ingerlaarunnaarallarput, silapilunneranilu pisariaqavitsinnagu angallattoqannginnissaa politiit kaammattuutigaat.

Allattoq Nicole Sander Bertelsen

decembarip 11-at 2023 10:40

Kitaani sumiiffinni arlalinni ataasinngonermi ulloq naallugu anorsarittassaaq, natsimasassaaq anoraasuarujussuartassallunilu. Taamaammat Kalaallit Nunaanni Politiit angallattut mianersoqqissaarnissaannik kaammattorpaat.

- Anorlingaatsiarpoq, aamma aqquserngit pisuinnarnullu aqqutissiat quasarput, taamaammat silapilunnerani angallanniartut angallattullu mianersoqqissaaqquagut, Ole Hald oqarpoq.

Ingammik Nuummi tamatumalu eqqaani anoraasuarujussuartassasoq, Danmarkimi silasiorfik, DMI, nittartakkamini allappoq. Tamatuma saniatigut aamma anorersuannguuttartumik natsimasarnissaanik anoraasuarujussuartarnissaanillu ilimasaarivoq.

QANOQ ANORLERTIGAA?

Anorersuaq. Anorersuaq sekundtimut 24,5 aamma 32,6 meterit akornannik anoreqarpoq.
Anorersuarmik anorsarittoq. Anorersuarmik anorsarinnera sekundtimut 20,8 meterit sinnerlugit anoreqarpoq.
Ulussaarsuaq. Ulussaarsuaq sekundtimut 32,6 meterit sinnerlugit anoreqarpoq.

Ataasinngornermi ullaap tungaani qulit ullup qeqqatalu akornanni sekundimut meterit 37-t 38-llu akornannik sakkortussusilimmik anoraasuarujussuartassasoq aatsaallu marlunngornermi anorikilliartulissasoq, DMI silap qanoq innissaa pillugu nittartakkamini allappoq.

Nuummi bussit aamma ingerlaarunnaarallartut, Nuup Bussii Facebookimini allappoq.

Nutaarsiassami kukkunermik nassaarsimaguit uunga allaffigineqarsinnaavugut.

Ataasinngornermi ulloq naallugu anoraasuarujussuartassasoq

QANOQ ANORLERTIGAA?

Aamma atuaruk