Assigiinngisitsisoqarpa?
Tamatumunnga atatillugu Tasiilap eqqaanilu imigassanik sakkortuunik tuniniaaqqusinnginneq qanoriliuuseqarfigineqarniarnersoq allanngorneqassanersorlu ilanngullugu apeqqutigaa.
Harald Bianco Tasiilaq sinnerlugu inatsisartuni qinigaareerluni kitaaniinnermini isini atorluarsimavai.
- Kitaaniinninni imigassaq kitaamiunut ajornartorsiutaasartoq ilaatigut maluginiarsimavara, allaammi Tasiilamiit ajornartorsiutaanerusartoq malunnartarpoq, Harald Bianco oqarpoq, imigassanullu tunngasunik maleruagassat assigiinnginneri eqqumiiginerarlugit. Kitaanimi imigassaq inerteqqutaanngilaq Tunumilu inerteqqutaalluni.
- Imigassamik tuniniaanermi matusinissamik imaluunniit ammatitsiinnarnissamik aaliangiiniaraanni nalilersueriaatsit assigiittariaqaraluarput: Tassa kitaani imigassaq matuneqanngikkuni Tunumi ammaqqinneqartariaqaraluarpoq. Aatsaammi taamaasiortoqarpat immikkoortitsisoqassanngilaq, Harald Bianco paragraf 37 tunngavigalugu Naalakkersuisunut apeqqutaani taama allappoq.
